LA ETE DAI PARTIGJANS O DE RESISTENCE
di Checo Placerean

Al jere sucedût un ribalton che al veve butât par aiar dut ce che al jere stât insegnât e fat sperâ par vincj agns di fassisim.
Ce si vevial di fâ intun moment di chê fate?
Mussulin diliberât, al veve metude in pîts une republiche cui siei fassiscj plui ferbints, ma i todescs a restavin in Italie ad in plen anzit, il Süd Tirol cul Trentin e il Friûl cun Lubiane e la Istrie ju vevin cjapâts dentri te grande Gjermanie: nô o jerin deventâts l'Adriatisches Küstenland sot un sorestant (Gauleiter) todesc.
Ca e là par la Europe, massime in Jugoslavie, al steve sbuliant un afâr che no jere la vuere solite, ma un cjapâsi a sclopetadis dapardut, muse a muse, rompint stradis e feradis, fruçant dipuesits e industriis, che e cjapâ il non di "Resistence" e chei che le fasevin di "Partigjans".
No je nassude di bessole ancje se la clime le à judade a nassi, ma e fo metude tal cjâf de politiche di chei di chê altre bande, massime de Russie. Al è un fat che ancje in Friûl i partigjans si son dâts dongje seont il colôr politic, e che ducj i grops a vevin un che al faseve la vore di comissari politic. Dute chê zoventût tornade a cjase ai 8 di Setembar dal '43 no saveve ce fâ: al jere masse spietâ che il mont al les cemût che a volevin chei altris. Al è simpri stât dificil spietâ cence podê sburtâ.
Cussì la idee politiche che o vin dite e cjapâ pît e, tai puescj plui salvadis, si scomençà a cjatâ int cu la sclope su la spale. De bande de Sclavanie i prins, po di là da la aghe e in Cjargne chei altris.
I nonos tal imprin no àn tignût dûr, ma po si son sclarîts: cun façolet e stele rosse su la barete chei di soreli jevât, cul façolet e stele verde chei che a vignivin fûr par dret o par stuart des parochiis, e altris colôrs e savôrs. A jerin nassûts i "partigjans", non vignût di soreli jevât.
A vevin chê di no lassâ in pâs i todescs, che a vevin metudis lis sgrifis su la Italie, e i fassiscj republichins di Mussulin, che al veve metude sù la Republiche di Salò, par tornâ a tirâ dongje i siei.
Vuere e je vuere!
Un colp di une bande, une bombe di chê altre, dams di ca, muarts di là.
Par cjoli la aghe al pes ducj chei in etât a vevin di lavorâ inte Todt, la imprese dai todescs par fâ cjamps di aviazion tal Friûl e dut ce che ur coventave. O cussì o soldâts cun Mussulin o a vore in Gjermanie.
Ma nancje cussì al è stât avonde!
Alore te sierade dal '44 a rivarin i cosacs, che si jerin butâts cui todescs, cun feminis e fruts: il Friûl, di Udin in sù, ur al prometerin se a scombatevin cuintri i partigjans a pro dai todescs.
A vignivin dal Don, dal Cuban e ancje de Siberie, cuntune fulugne di cjavai e cualchi dromedari; si plantarin, tant che a cjase lôr, e e scomençâ une altre pagjine de vuere in Friûl.
I partigjans, cu la stele rosse, intant si jerin ben plantâts; in Cjargne a jerin rivâts adore di meti sù une republiche Cjargnele, che e veve tacât a funzionâ. Des bandis di Nimis, di là de Tor, a jerin rivâts adore di tentâ un afâr dal gjenar, partigjans cu la stele rosse e cun chê verde.
Plui in là al jere sucedût alc altri, par vie che chei cu la stele rosse a vevin fate socie cui partigjans slovens.
Fat al è che i partigjans no jerin plui dacuardi fra di lôr: la politiche di partît e chê dai confins da la Italie dopo de vuere e finì cul metiju un cuintri chel altri. Tant che a Porçûs i sorestants di chei cu la stele verde a forin copâts di chei cu la stele rosse.
Cosacs e todescs a tornarin a passâ la Tor e a brusarin Nimis e Faedis e compagn a faserin sù pe Cjargne, obleant i partigjans a parâsi tai boscs.
Alc dal gjenar al tocjâ sù pal cjanâl di S. Francesc e sù par Tramonç.
Ancje chei de stele rosse a scugnivin parâsi di là dal Lusinç.
Tal mieç di chest davoi la int e leve simpri di mieç, spelade di une bande e di chê altre, par resons diferentis.
Al è clâr che no gloteve ni cosacs, ni todescs , ni fassiscj, ma i partigjans (che a jerin in font de sô int) ancje se a jerin de sô bande, le metevin in crôs.
Mês di torments chenti, intant che tancj furlans in Russie a murivin di frêt e di strussiis te grande zirucade.
Cul non di Diu, ai prins di Mai dal '45, ancje il flagjel de vuere al finì: la int si sintì diliberade dal cjalcjut.

NOTIS:
(1) Cussì si clamin lis dôs spedizions talianis in Russie.