LA SECONDE VUERE MONDIÂL
di Checo Placerean

Ce che al jere stât semenât si è madressût e, dopo un tire e mole che al costà la ocupazion de Boemie e de Moravie, sul afâr dal curidôr di Danziche e sclopà la vuere.
La Italie - une vore par vie che e jere plui indaûr di ce che al diseve il menadôr - si tignì fûr sul imprin.
Si jere te sierade dal 1939 e si tirà indenant fin te vierte dal '40, cuant che la Gjermanie e scomençà a fâ la vuere pardabon.
Danimarcje e Norvegje a son stadis lis primis a paiâ e subite dopo la Olande, la Belgjiche e la France.
I todescs si jerin parecjâts come cu va: a vevin imparât a no fâ i fai de vuere dal '14, e a fruçarin in pocjis setemanis francês e inglês che a àn scugnût molâ. Si cjaparin la France che a riduserin a sbrendui, e la Italie, par no cjatâsi di bande, ai 10 di Jugn dal '40 e tacà ancje jê, fasint la figure di chel che al cope un za muart. L'afâr al deventâ seri cu la Ingletiere, che Hitler nol rivà adore a cjapâle.
Cussì e nassè la front de Libie par la Italie e la vuere sul mâr.
I tocjà fâ la vuere pardabon ancje a la Italie, e riclamâ int a bati.
Ma cheste volte no si mobilitarin ducj, dome ce ca ce là: cussì tal desert de Libie no mandarin cetancj furlans. Ma cuant che Mussulin al tentà di tacâ in Albanie cuintri la Grecie, i furlans cu la division Julie a son stâts sielzûts i prins. Si pues dî che ju mandarin dome cui scarpets, mâl comandâts e mâl metûts.
I grêcs a tignivin masse dûr tant che i todescs a scugnirin dâ une man par gjavâ i talians dal imbroi. I furlans de Julie a àn tignût dûr a sun di patî e murî: ordin di murî sul puest cence molâ e cence vê cun ce e parcè bati.
Si tratà di 24.000 muarts in buine part furlans: par prionte e là sot ancje la nâf "Galilea" plene di furlans che a tornavin in Italie a polsâ.
A la Italie no leve trop ben, ma la Gjermanie e jere impiade, e tal mês di Jugn dal '41 e tacà la Russie. Une robone! Al sameave che nissun al rivàs a fermâ i todescs.
Ce si vevial di fâ? In Libie si devin botis, ma si 'nt cjapave di plui, sul mâr si piçavin i Inglês, ma no si ju fermave; cussì Mussulin al mandà i talians in Russie par tignîsi sù.
Ancje in Russie une buine part a forin furlans, tant tal C.S.I.R. dal '41 che tal A.R.M.I.R. dal '42 (1).
Ma vevino sanc dome i furlans di spandi par la Italie? Nancje che si fos pensât che o jerin la miôr cjar di canon!
I todescs a cjaparin in man il comant ancje in Libie, ma nancje a lôr ur le drete: in Russie tal unvier dal '42 e le mâl ancje a lôr a Stalingrât e la vuere e de di volte.
La zirucade de Russie ai furlans e costà lagrimis e sanc: a son vîfs ancjemò cualchidun di chei rivâts adore di tornâ, ma la grant part e je restade là sù, muarte glaçade. Intant, par vie dal Gjapon, la vuere e veve strissinâts dentri ancje i Americans: chei nus netarin da la Afriche e nus jemplarin di bombis cence lâ masse pal fin.
Cul jutori di chel flagjel sicilian che e je la mafie, a rivarin a meti pît in Sicilie e cussì e madressè la fin di Mussulin.
Nol à rivât adore di tignî adun nancje i siei, che cul jutori dal re Vitori - chel che lu veve metût sù dal '22 - lu àn parât vie e metût in pereson.
Pai todescs dut l'afâr al someà un tradiment ae taliane vie, e cussì a deciderin di cjapâ in man la Italie.
I soldâts talians, no savint ce fâ e a cui ubidî, ai 8 di Setembar dal '43 a jerin tornâts a cjase, in buine part a pît. Il guvier dal re Vitori al veve molât cui americans e cui inglês; si vevial tun colp di metisi cuintri i todescs?
I furlans, che a jerin in Jugoslavie o li ator, a cjaparin la strade di cjase: la idee e jere chê di finîle cuntune vuere deventade cence mani.
Malapaiâts, ma no tant stupits di bati cence parcè!
Cussì i todescs a cjaparin dut in man cun cualchi colp tirât ca e là e a plantarin la front cuintri dai americans e di chei altris te basse Italie tor di Cassino ad ôr di Napoli. E la vuere no finî.
In cuasi ducj i paîs si veve sunadis lis cjampanis, crodint che la vuere e fos finide, impen il piês - disìn cussì - al veve ancjemò di vignî.