SOT DE ITALIE
di Checo Placerean

Si che duncje dal 1866 a rivarin i talians, cence che nissun ju spietàs, par vie che si saveve che lis stevin cjapant par tiere e par mâr. La Prussie e veve metude in zenoglon la Austrie e cussì i talians a cjaparin la corse, par rivâ cuissà dulà. A scugnirin fermâsi su la Tor a Vierse, dulà che a cjaparin une fruçade che ur cjolè il flât. Ma la Austrie, pûr di cumbinâle cu la Prussie, e molà il Venit e dôs parts dal Friûl a la Italie, tirantsi di là di Ponteibe, dal Judri e dal riul Tai juste ad ôr di Çarvignan. I Furlans a restarin incocalîts, parcè che no se spietavin: juste cualchi predi al tentà di alçâ la creste, cjantant il «Miserere» impen dal «Tedeum». La siorie di çocje massoniche e cjantà vitorie e e plantà un batibui cuintri dal arcivescul di Udin, bonsignôr Dree Cjasesole, che al clopave di ca e di là par vie che nol jere persuadût che e fos stade propit finide cussì (1).
Ma i talians a jerin rivâts par stâ e par implantâsi. A gambiarin lis leçs e lis usancis di prin cu lis lôr e ai Furlans ur tocjà:
- di paiâ tassis mai paiadis prin, parfin su la farine di fâ la polente;
- di partî par fâ il soldât, che prin i tocjave dome a cualchidun – par solit mâl viodût dal plevan (2);
- di sintîsi tes mans dai parons plui di prime, cence la buse di vê un jutori dal imperadôr, par solit plui dolç di cûr dal paron;
- di scugnî tratâ cuntune raze di impleâts gnove cree e cun tante di creste, ma mancul pratiche e oneste di chê di prime. E i Furlans si son adatâts ancje a cheste novitât, sperant salacor che no duràs, come che al tocje di lei in plui di un catapan parochiâl (3).
A sintîju, i talians al someave che a vessin di puartâ cuissà ce, massime par vie di civiltât e progrès.
Intal lôr a volevin jessi i liberadôrs, cirint di metiure te coce ai contadins furlans, che a continuavin a fevelâ dal 1866 come dal an de invasion.
Po a gambiarin, voltantju par talian, i nons dai paîs masse furlans (e di Sanpalai al vignì fûr San Pelagio e di Talmassons al veve di vignî fûr Talmassonso) e, tes scuelis, i fruts a vevin di imparâ che a jerin simpri stâts talians, ancje se Dante al jere stât dal parê diferent (4).
Al è just, e par chel al va dit, che i talians, sul imprin, a àn cirût di fâ alc in Friûl, che al coventave: e je di nomenâ la ferade par Pontebe e, cu la pazience, ancje chê par Triest; ma no àn volût savê dal progjet de Austrie di incanalâ il Tiliment dulinfûr, par vie che la Austrie e pratindeve di profitâ par 99 agns dai terens cuistâts ae aghe.
La ruede de storie e scomençave a cori di une bande che il popul nol cognosseve, fasint contents chei cuatri, par solit siôrs e parons, ingrispant il cerneli ai plevans, par vie che i talians a jerin mancul catolics dai mucs e a businavin cuintri il pape, lassant la int in spiete cence savê ce fâ.
Cussì si pues capî ancje il «plebiscito» par la Italie. Si tratave di votâ par la Italie e par Vitori Emanuêl, sì o no, ma no di sielzi alc altri.
A saltarin fûr cuasi ducj sì, par fuarce. Dome di cualchi bande, come a Cosean (5), a olsarin dî di no, lassantsi remenâ de massonarie, che e veve la cove a Sant Denêl; o a Montenars, dulà che al nassè un barufon par vie che a volevin votâ dome par Vitori, no par la Italie, restant il Friûl indipendent ancje se cul stes re di Italie, come che al jere il ream de Lombardie e dal Venit cul imperadôr da la Austrie. Ma dut al restà scjafoiât sot dal pês di chei che no capivin, di chei che no olsavin o di chei che a volevin sperâ.

Notis:
(1) Al ven dât l’assalt al palaç dal Arcivescul Cjasesole, al ven maltratât e criticât e che daspò si ritirarà a Rosacis.
(2) Il servizi di jeve al scomence ai timps di Napoleon e tancj di lôr a son renitents.
Il servizi militâr al è ancje une ocasion par indutrinâ in sens patriotic.
(3) Diari storic e no il catapan che al è un libri dai muarts.
(4) Al met in lûs lis diferencis linguistichis.
(5) Al ven dit «Cosean dal no».