IL PIGNARÛL
di Josef Marchet


Ce vuelial dî  che usgnot o sês in pôcs? 
Ah, il pignarûl! Cumò mi impensi che o ai lampât, vignint in glesie, Toni Sclese che al leve jù cuntun medili su la spale, plui lunc des predicjis di pre Scjefin. Dait un cuc ta la arie, cumò che o tornais a cjase: nissune maravee che al vebi alçât di pês il jubâl a cualchidun, chel temul par fâ il fugareli plui biel dal circondari. E la zoventût, e sarà ator a brascjam, a vinceis, a fassuts di soreâl … Si sa po! Lis tradizions a van rispietadis, massime chês che no disturbin la cussience e che no oblein a scrusignâ te scovacere de animate. 
Vêso fat il presepio sot dal seglâr? Vêso metût chel tâl che al fâs la polente, chel altri che al mene la pigne, chê femenute che e va a aurî aghe cul buinç,  chel che al rustìs lis bueriis, chel vieli che al sune la bolçare? E il mulin cu la muele che e cor suntun riul di stagnole? E il cjiscjel cui manigolts che a fasin la vuaite cul spiçot su la spale? E cui sa se, par cumbinazion, si sês visâts di meti, in cualchi cjantonut, ancje la Madone cul Bambin e Sant Josef? Parcè che chei a son i ultins e si sta pôc a dismenteâsi di lôr. E vêso santificât il Nadâl cuntun biel dindi? E la gnot dal prin dal an  cuntune biele cjoche? E la domenie di mieç cuntun fregul di ghiringhel e cuatri bolçaris in famee? Mi à dit Tite Bruscje che nol saveve cemût parâsi, par vie che lu vevin invidât cu la armoniche in siet-vot cjasis, chê sere stesse: puare anime, ce vitis di fâi fâ! 
Di po, Masut, tu che tu sês inscuelât e che tu vâs ogni dì a lei il sfuei ta la ostarie di Baduscli, no ise vere che, ancje chest an, sot des fiestis i gjornâi a jerin plens di robariis, di imbroieçs, di trucs, di sgrifignaments? Cjo, la zoventût e à dibisugne di carantans, par rispietâ lis tradizions! O viodarês di chi indenant, sul carnevâl, se nol tocjarà di cori a cjase prin di gnot, par no cjatâ su la strade cualchidun cui façolets su la muse e un scliçot di fier in man … a cirî la caritât! Simpri par vie des tradizions.
 Sintît mo: jo o soi di chei di une volte, si lu sa, ma o soi a dîus che, co si jere fantats noaltris, si mantignivin lis usancis miôr di cumò: ancje tantis bielis usancis che in dì di vuê si son bielzà distudadis. Ma nol coventave ni disvuedâ i gjalinârs dal prossim, ni spietâ la int su lis stradis scuris, ni riscjâ di fâ cualchi setemane sul taulaç, par amôr des usancis. E i pignarûi si ju faseve grancj e biei e fis, cence saltâ il rosari. No mo, Jacum? No mo, Blasut? No mo Checusse? Voaltris o podês dîlu, o podês fâmi di testemonis, se no dîs il vêr. 
Doman, messe cjantade ca sù, come il solit! O speri che su la albe des undis nol sei plui nissun pignarûl di impiâ. E cun cheste us doi la buine sere.