LA STATISTICHE
di Josef Marchet

Cussì o sin rivâts in cjâf di un altri an. E, par vie che in plêf no je stade fate ancjemò la statistiche de parochie, o fasarìn noaltris par intant chê de nestre vile. Jo o ai notât cul zes daûr de puarte ducj i nassûts e i muarts e i sposalizis, come che a fasevin par antîc, cuant che par nassi o par murî no coventavin cjartis ni timbris.
L’an passât di cheste stagjon, a Gargagnà disore si jere in sietcent e otantetrê; in dì di vuê o vin di jessi in sietcent e otantevot. Pocjis diferencis. O ‘nt vin lassâts pe strade nûf: doi agnuluts; la frutate di Paiarin che e je muarte in Svuizare (ce coventavial che Toni Paiarin al mandàs chê cristianute ator pal mont? No aial vonde par vivi, cundut il teren che al lavore?; la viele di Treseman che e veve su lis spalis nonante carnevâi (cence vê mai fat carnevâl, puare femine) e une cjame di strussiis di ogni fate (cun chê famee bastarde dulà che i jere tocjât di vivi) e cualchi centenâr di miârs di rosaris, che dal sigûr no à tocjât purgatori nancje cu la ponte dal dêt piçul; mê comari Rose dal Puint che e je restade cu la scugjele in man intant che e lavave la massarìe; il Temul di Rutizze che si è brusât i bugjei cu la puinte di Baduscli; Miliut Fasanel che al è restât sot dai fiers tal ospedâl; Zuan Menizze, biadat, che si è visât di jessi in chest mont nome par intric, cun tantis che a ‘nd à fatis in vite sô e nissune di drete: lu vin cjatât in trê tocs su lis sinis de ferade e o vin scugnût puartâlu vie cence lûs e cence crôs, tant che une bestie: chê e je stade, par gno cont, la zornade plui nere di dute la anade.
Di batisims o ‘nt vin fats cutuardis: doi frutins a son tornâts a lâ a pene rivâts, spaventâts salacor dal mondat indulà che a jerin colâts (e cui sa che no vebin vude reson, che a dî la veretât, a jerin capitâts in dôs fameuçatis imbastidis malementri. Chei altris dodis a son vîfs e Di’ lu vueli che a cressin pulît cu la anime e cul cuarp: jo dal sigûr no sarai a viodi ce umigns che a deventaran, ma si à dibisugne di int drete, che di chê stuarte a ‘nd è tante che si vûl.
Sposalizis vot: trê fantatis a son ladis a marît fûr dal paîs; cuatri forestis a son vignudis a stâ culì. Ce che a son e ce che a valin jo no savarès a dî ancjemò: ator pe glesie o ‘nt viôt une sole; une altre mi pâr che e à fat l’ûf a pene rivade: misteris di nature! Une e va a fâ scuele in Perarie e si le viôt nome a buinore e di sere, cuant che e partìs o che e rive cun chê metraie di lambrete; chê altre e je rivade dongje chest mês passât e jo no sai ancjemò ce muse che e à.
Di chês che a son ladis a marît fûr di paîs, Mariute di Safìt e jere un bombon di frute, plene di sintiment (plui che no sô mari!): pecjât che e sei svolade vie lontan. Une altre e jere dome biele, e lu saveve tant, che dibot e sclopave di bravure. La tierce no jere ni biele ni buine e nissun si è mai impensât di vaîle.
E po a ‘nd è une di Gargagnà che e je restade a Gargagnà: e à cjolt il fi di Toni dal For; al ven sù di dì, cualchi volte, che il Signôr ju fâs e il diaul ju compagne! E cussì i conts a son fats. Jo no sai se o sarai ca a fâju ancje chest an cu ven: al po stâi, come nuie, che mi capiti di restâ pe strade, che o soi madûr. E ognidun di nô, zovin o vieli che al sei, al à di pensâ che vuê un an si pues jessi tal numar di chei che a saran lâts a fâ mantiis di bocâl. Al tocje di tignîsi pronts a dut. Al diseve il puar plevan vieli che si è ducj di crep e di un moment al altri si pues cjatâsi a flics. Cun cheste us doi la buine sere e il bon an, cul non di Diu.