LA VIERTE
di Josef Marchet

Bielis zornadis, no mo? Zornadis di aur. Pe taviele a son come il lat: butui che si spalanchin sot dai voi, ramaçs che si vistissin di floridure de sere ae buinore, jerbe che al pâr di sintîle a sbisiâ di tant svelte che e ven sù, cecjis che a sverdein di dutis lis bandis. No isal un spetacul? No isal un meracul? Ce di miôr di passâ lis oris su la tiere, di sintîle cjalde, vive, gnove, plene di fuarce e di salût? 
Jo no ai mai vude invidie di chei tâi che a passin la lôr vite cui pîts sot di un taulin e cul penâl in man, a sporcjâ cjarte par chei uficis, ancje se a àn un lavôr di pocje fature, simpri a sotet e cu la mesade sigure: di cheste stagjon, o dîs la veretât che no mudarès cun lôr nancje se mi indorassin da cjâf a pîts. In chest mont al è distin di no jessi mai contents e noaltris contadins o vin il viziat di contâ nome il sudôr di chês zornadis che nol ven mai gnot, dai lavôrs che no finissin plui e che si corin daûr, des faturis che nus rompin i vues; e par solit no si visìn dal ben che o vin, ta l'anime e tal cuarp, par vie di cheste vite che o fasìn in libertât, lavorant cuant che dut al lavore e polsant cuant che dut al polse. Noaltris no si visìn di chest meracul che al nas ogni dì sot des nestris mans che o sin nô a judâlu a nassi. 
Ce vegnial a dî Tite Stope che lui ai meracui nol crôt, parcè che no 'nd à mai viodûts? No isal un meracul avonde biel e avonde grant che il so ledan al deventi une rose, une fuee, une panole, un rap di ue? Cui isal mai stât bon di fâ cu lis machinis e cu la chimiche un gran di forment che, tornât te tiere, al bute fûr un fros, po une gjambe, po un spi? 
Savêso ce che o ai di dîus? O sin dome noaltris omenats che, cu la nestre tristerie, o restìn simpri fers e no sintìn ni Vierte ni Sierade, ni soreli ni ploie, ni frêt ni cjalt. Cumò e je stade Pasche, e la Pasche e ven ogni an cuant che dut il mont al torne gnûf, come par insegnânus a mudâ piel ancje a noaltris. Ma ce sono bogns di mudâ tancj di lôr? Ce aial mudât in chescj dîs Vigji Brustul? La gjachete: al à lassade a cjase chê stiriane cragnose che al puartave vie pal Invier e al à metude une camisole di saten! 
E Mine di Pevar ce aie gambiât? I mulots, che no si le sint plui a darpedâ pai pedrâts, parcè che cumò e va ator cui scarpets! E il Ros de Roste ce aial gambiât? Il mani de pale, che a 'nd à fat un gnûf juste il dì di Pasche dopomisdì, par no stâ dibant! 
In chescj setante agns che mi visi jo, il mont al à mudât scusse, che no si lu cognòs plui: la maniere di vivi, di lavorâ, di lâ ator, i vistîts, ju imprescj, i divertiments, fintremai la mangjative, dut al è diferent di ce che al jere cuant che o jerin canais. Vadì che par antîc a volevin cuatri o cinc secui par fâ tante strade che si è fate cumò in cincuante agns. Ma se o lin a scrusignâ dentri vie, tai sucrits de cussience, o cjatìn simpri chês tristeriis istessis e chês rognis istessis; se no piês! E je l'animate di gambiâ, malandret di mondat - che Diu mal perdoni! - e no la gjachete o lis çoculis o il mani dai imprescj! Doman, Messe aes vot. E cun cheste us doi la buine sere.