PREAMBUL
di Josef Marchet


Al è dibant lâ a cirî Gargagnà su lis mapis dal Friûl: no si cjatilu nancje in chês plui minudis e precisis che a doprin i militârs, indulà che a son segnadis fin lis farcadicis. Gargagnà nol è une "entitât gjeografiche"; al è une "entitât morâl" un fat di custum: al è dut il Friûl cjalât de bande dal ledrôs, di chê bande dulà che une tele e mostre ducj i siei grops, dutis lis zontis, lis mendis, i difiets, in sumis dute la veretât. 
O sin usâts a une forme di retoriche a bon presi, che e puarte adalt tant il nestri paîs, che il nestri popul, parsore di ducj chei altris vicins e lontans. Chest al è il dret; ma e vûl metude in cont ancje chê altre muse, bisugne vê la fuarce di cjalâ dut cence parevoi e di pesâ dut cence baronade. Intun cuadri lis robis claris a parin plui lusorosis se a son dongje lis ombris e lis maglis; e se no son ombris ni maglis, si pues stâ sigûrs che e je dute une bausie e no ven nancje voie di cjalâle. 
Cheste veretât e je la urdidure di chest libri; la trame, invezit, e je une fente, une bausie: e salacor i covente une peraule di spiegazion. Secont cheste fente, Gargagnà Disore e je une vile dal Friûl di Mieç: une frazion, nus àn insegnât a dî i talians, cun siet-votcent animis; e in union cun Gargagnà Disot, cun Lupignan e cualchi altri cjasâl plui minût, a formin il Comun di Scufons. A Gargagnà Disot e je la comugne e la plêf e un pôc di moviment comerciâl che al da a cheste vile un fregul di ande citadine. A Gargagnà Disore nol è nuie: al è un borgat di staipis e di landris, di murats cence stabilidure, di tamars plens dome di catans e scovacis, di int grubiane plene di presunzions e di pretesis. 
Da pît la vile e je la uniche abitazion civîl dal paîs: la ostarie di Florean Baduscli, un forest che al sa fâ i siei interès cence trops scrupui; insom, a un tîr di sclope des cjasis, e je la gleseute di S. Pieri, une costruzion dal Cinccent cuntune cjampanute sul colm de façade e un puartiut devant de puarte, su la strade. Za timp in cheste glesie al jere un vicjari curât, che al dipendeve dal plevan de vile Disot; ma cumò nol è nissun, par vie che la int di Gargagnà Disore e sta miôr cence che i predis a vegnin a meti il nâs tai lôr afârs e a impaçâsi des lôr cragnis. Cussì il paîs al è cence cure di animis di nissune sorte: il plevan al mande cualchi predi a dî messe a S. Pieri la domenie e cualchi rare volte in disdivore (par solit al rive sù sflanchinant e tirant la ansime, pre Scjefin, un capelan vieli e clopadiç, che a 'nd à une gnoche a fâ chel cuart d’ore di rive). La glesie e je piçule, che un cincuante di lôr a stentin a stâ dentri: al ven a messe un troput di feminis, cualchi fantaçute, un cjap di fruts e vot o dîs umigns. 
La vilie des fiestis, sore sere, il muini de glesie al ten sù il rosari, e une dozene di personis, tra grancj e piçui, a vegnin a preâ. 
Il Muini di Gargagnâ al è Vigji Scuete: un muini monumentâl, grant e grues, sclet di lenghe e simpri sigûr di se. Nassût in chel altri secul, al è stât dibot trente agns pal mont, prin su lis fornâs di modon e po a fâ il manoâl e il muradôr. Cui carantans cjapâts e metûts vie al è rivât adore di cjoli un pâr di cjamputs di tiere e une barache che al à sdrumade par fâ sù une sô cjasute. Passade la prime vuere nol è plui lât ator: al à vivût cun chel tocut di braide e fasint dalminis pardut il paîs. Tal prin no i mancjavin aventôrs e al lavorà fuart, ma dopo chê altre vuere a son lâts simpri al mancul, e cumò a son restâts dome sîs o siet viei che, vie pal Invier, a puartin ancjemò chei imprescj. 
Vigji al fâs il muini sore nuie, ma cun chê scuse si sint la prime autoritât dal paîs. La sere prin des fiestis al va jù dal plevan a cjapâ i ordins pal indoman e il plevan i comande di publicâ in glesie l'orari de messe e des funzions e cualchi altri avîs. E di chê bande lui si profite par tirâle in lunc, strucjant fûr dut ce che i bol tal stomi: lis sôs opinions, i siei coments, lis sôs critichis, lis sôs sentencis sul cont des personis e dai fats di Gargagnâ Disore. Cussì e ven fûr ogni volte une "predicje dal muini" curte, sclete, cuinçade cun sâl e pevar e asêt. Parcè che al va dit che Vigji Scuete nol à parevoi ni smuars in bocje: nol à rivuart par nissun, ni zovins ni viei, ni puars ni siôrs, ni ignorants ni studiâts, nancje pe sô parintât, nancje par sô fie, nancje pai predis… Co no i pâr juste une cualsisei robe, al sune pal timp cence nissune remission. 
Vigji Scuete al è un bon cristian di fede ferme e sclete, cence complicazions e cence buerisinis, e i siei judizis a son, in fin dai conts, judizis che al podarès dîju il plevan; e je la maniere di presentâju, lis peraulis, il lengaç che al taie, che al sponç e cualchi volte al è tant ordenari, che il plevan nol podarès fâsi sintî a doprâlu. 
Cussì mo cualchidun al à vût il pinsîr di rincurâ e di meti insieme almancul un braç di dutis chestis predicjis, che a son stadis publicadis ancje in cualchi sfuei, come testemoneance di vite furlane intun moment speciâl de nestre storie - i prins agns dopo de vuere - e come esempli di lenghe furlane ancjemò nete cence messedancis e cence contaminazions. Par chest troi al è rivât chest librut.