I LATINS
di Josef Marchet

Che la cjadene des nestris monts e sei un confin naturâl… e sacramentâl tra il mont latin e chel altri al è un vanzeli co si trate di chei di là che a cirin di vignî di ca, e je une monade cuant che a chei di ca ur ven la pice di passâ di là.
I prins a tirâle fûr a forin duncje i Romans, par vê une scuse, co ur vignì tal cjâf di fâsi parons di cheste regjon, indulà che no vevin mai metût pît e un altri popul si cjatave a vivi dopo mai. E di chê volte in ca la cuestion dal confin creât dal Signôr e ven tirade fûr ogni volte che no va ben: al timp di Otavian i Romans a jerin su la Donau in Gjermanie e in Britanie, e za vot agns i Talian a jerin a Lubiane e a Menton, in barbe a la volontât di Diu che al à creât il confin naturâl des monts!
L'implant di une colonie latine a Aquilee al jentre tal cuadri de politiche cuintri - celtiche che Rome e jere daûr a fâ in chei agns. In chê volte de grande vuere cuintri Anibal (Annibale) ducj i Celtics da la Alte Italie a vevin sperât di podê diliberâsi de paronance dai Romans e si jerin metûts cuintri di lôr. Dopo la scopule cjapade a Zama, i Cartagjinês a vevin scugnût fâ la pâs cun Rome (a. 201), ma i Celtics no le vevin fate. I prins vincj agns dal II secul denant di Crist a forin spindûts dai Romans a cjastiâ chest popul, e lu cjastiarin cun maçalizis spaventôs, cun deportazions e cul implantâ e rinfuarçâ coloniis in dute la Alte Italie: cul snazionalizâle, al vignarès a jessi. In cheste maniere a cjatavin ancje la fate di mantignî lis lôr promessis cun chei altris popui, plui vicins, che ur vevin dât jutori di soldâts e di mangjative te vuere cuintri i Cartagjinês: a menavin sù i ex combatents di chês bandis e ur devin tiere e sclâfs celtics par lavorâle.
In Aquilee, dal 181 denant di Crist, a rivarin sù 3.000 fameis (15 o 20 mil di lôr) in buine part dal "Samnium" (in vuê Abruç, Molîs e part de Campanie): une vere invasion di bassarûi. Si stabilirin te gnove colonie e si spartirin il teren. Si pues calcolâ che dut il plan, di ca dal Tiliment fintremai da pît dai cuei, al sei stât dividût in tancj "fonts" di uns 35 cjamps; trê mil fonts di 35 cjamps furlans di vuê (50 "iugeri") a son passe cent mil cjamps di misure, cence contâ il di plui che al fo dât ai centurions e ai cavalîrs (ai centurions 70 cjamps, ai cavalîrs un centenâr di cjamps par om; i centurions a saran stâts une trentine, i cavalîrs no si pues dî trops).
Dodis agns dopo, a forin mandadis altris 1.300 fameis latinis e chestis a varan scugnût adatâsi a implantâ i lôr fonts sui cuei o in chei sîts che no jerin za stâts consegnâts ai prins. Tratantsi di une colonie militâr, i umigns a restavin obleâts al lôr servizi in Aquilee o in cualchi piçul presidi che al sarà stât implantât su lis posizions strategjichis; sul so fonts ognidun al varà mandât un fatôr (il "servus villicus") e chel numar di sclâfs che al coventave par fâ lis voris. Si pues crodi che almancul
une part di chescj sclâfs a fossin, come il solit, int cjapade sul puest e salacor i antîcs proprietaris.
Cussì la Furlanie e colave sot di un paron dûr, risolût a no molâle ni par pôc ni par trop. Aquilee e fo, intal prin, une citât di uns 30.000 abitants, cence contâ i Carnics che si cjatavin a jessi za sul puest; ma in curt e deventà plui grande par popolazion e impuartance, parcè che par un secul e mieç e fo la uniche colonie latine di Vignesie orientâl e simpri pôc o trop in pericul. I forin dâts i "dirits" latins e no chei dai citadins romans, almancul tai prins timps: e chest al pues volê dî che di Romans di Rome a 'ndi veve di jessi pôcs. Sul cont da la ocupazion efetive, si pues ad implen dividi la regjon in trê parts: il litorâl dulà che al podeve jessi coltivât e il plan a forin ocupâts dal dut e in pôc timp latinizâts, la part di mieç fintremai sot lis monts e fo ocupade dopo midiant di fatoriis implantadis ca e là, ma la popolazion e restà la plui part cjargnele e par cualchi secul e conservà la sô lenghe; tes monts e fo implantade cualchi "statio" e cualchi presidi nome su lis stradis che plui tart a vignirin viertis: Zui (Julium Carnicum) al fo implantât un secul e mieç dopo. Cheste division e risulte tant da la archeologjie come de toponomastiche.