AKILEJA
di Josef Marchet

Si pues dî che dibot nissun di tancj che a àn tratade la storie dal Friûl al vebi mai olsât a meti in dubi che Aquilee e sei stade implantade dai Romans: al bastarès cjalâ il non. E po il storic latin Titus Livius al conte cun dute la precision cuant e cemût che e fo implantade. Ma il non di Aquilee nol è latin, come che al pâr: al finìs in -eja, (tant che Noreja e Celeja) che no je finâl latine, ma celtiche. "Akileja" al vûl dî "citât sul Akilis" (che al à di jessi il non di une aghe) e nol à nissune parintât cu la acuile. E des bandis di Aquilee a son stadis cjatadis monedis di arint celtichis dal tierç secul prin di Crist (i Romans a saressin rivâts dal 181 p.d.C.) e ogni tant li al salte fûr cualchi imprest celtic dal gjenar di chei di La Tène, che al ven a jessi di un grum di secui devant. Il Friûl al jere, duncje, abitât dai Carnics fintremai sul mâr. I Romans no fondarin Aquilee, ma a implantarin in chel sît une colonie latine, salacor dopo di vê sdrumade la "Akileja" celtiche. Ce che al conte Livius sul implant de colonie al pues jessi vêr, parcè che lui al veve sot i voi i documents uficiâi dal guvier roman; ma ce che al conte prin, su la invasion dai Celtics transalpins che a saressin vignûts dal 186 p.d.C. par stradis mai cognossudis e mai praticadis, in numar di 20.000 armâts a implantâ une citât intun sît disabitât, abàs des monts, e i Romans ju varessin parâts indaûr, sdrumant la citât e comandantjur di no fâsi viodi plui, e je nome une des solitis tradizions che si creavin a Rome par justificâ in cualchi maniere lis vueris e i maçalizis che i Romans a fasevin par ingrandî il lôr domini e lis lôr risorsis. Livius al fâs simpri cussì: al staronze la storie cu la tradizion popolâr, in mût che e deventi une esaltazion di Rome e des sôs impresis (par chel il Mommsen al scrivè la sô famose "Storie di Rome" cence nancje vê indiment lis contis di chest padoan inromanât). In realtât ogni pôc che si abadi, si scuen dî che Livius, in chest pont, al scrîf robis impussibilis o contrastantis: cemût mai i Celtics de Carinzie o dal Staiar, cressûts di numar, si varessino impensâts di bandonâ chês posizions cussì bielis, viertis e morbidis, par vignî a stabilîsi intun Friûl salvadi e puar di risorsis? No varessino podût slargjâsi plui in là e plui in sù? E cemût si puedial crodi che 20.000 armâts, cun feminis e fruts e cui lôr grabatui, a vebin podût vignî fûr pal cjanâl dal Friûl o pe Mont di Crôs, co nol jere nancje un segnâl di troi, ma nome bosc e ruvîs? E po Livius intun lûc al dîs che culì no cjatarin nissun abitant, e intun altri al lasse capî che a vevin puartade vie un grum di robe ai abitants, indulà che a jerin passâts. Dal rest a son tantis e tantis lis provis che in Friûl a jerin un grum di Celtics prin che a rivassin i Romans e che no scjamparin ma a restarin ancje dopo. La storie de invasion dai transalpins e coventave par fâ viodi che la colonie romane di Aquilee e jere stade implantade par necessitâts strategjichis.