IL NESTRI ÇOC
di Josef Marchet

A volê cjaminâ sul salt, si à pôc ce contâ su la preistorie dal Friûl. Ce che aromai al pâr sigûr al è che la lidrîs de nestre int e je celtiche. I Celtics a forin la prime butade di popui "arya" che e rivà in Europe. Salacor doi mil agns prin di Crist, i prins trops a jerin za sui confins orientâi. Il grues di cheste int si stanziarin dulà che a nassin lis aghis plui grandis: la Donau, la Elbe, il Rain e dilunc fûr dal cors de Donau fintremai di là di Viene. In Svuizare a La Tène, e in Austrie a Hallstatt a forin scuviertis lis plui antighis relicuiis di cheste raze. Dopo di vê cjatadis, tes monts, lis gjavis di fier, i Celtics a sviluparin la industrie di chest metal, ancjemò cuant che chei altris popui a cognossevin a pene il bronç; e cu lis armis di fier si sparniçarin in lunc e in larc, de Spagne in France, in Ingletiere, in Italie, in Boemie e jù pai Balcans, fintremai in Asie Minôr, simpri lant indenant par dongje des grandis aghis. La prime grande civiltât de nestre çocje. I Celtics a jerin dividûts in putrops grops, che si guviernavin in forme republicane, plui di râr in forme di piçulis monarchiis. Un di chescj grops al jere chel dai "Karn" che si stanziarin in chês regjons che a puartin ancjemò chel non: Carinzie, Crain e Cjargne. Il distin al à volût che il paîs dai Carnis al deventàs la beorcje indulà che si trussin altris trê razis vignudis dopo: la gjermaniche, la latine e la sclave, rompint une unitât che e jere za pôc salde pes grandis monts che le rompevin.
I Carnis che a ocuparin il Friûl a partignivin, duncje, a un ramaç diferent di chei Celtics che, de  Svuizare o de Galie, a rivarin te alte Italie: tra chei e chescj e restà simpri la bariere dai Venits, popui di raze Iliriche che in Friûl no si fermarin altri che tal Cjanâl dal Nadison (parsore Sant Pieri dai Sclavons al fo cjatât un grant simitieri di Venits, e un altri di là di Cividât).
Nissun al pues dî cuant che a rivarin i Carnis tes nestris monts, ma al è facil che a sedin vignûts un pieç di timp denant di ce che a disin i storics. I vanzums dai Euganis tal cjanâl dal Lusinç e chei dai Venits tal cjanâl dal Nadison a son ritignûts plui antîcs de rivade dai Carnis: ma al va dit che i Carnis, intal prin, a restarin lontans di chescj cjanâi, e che no lassarin stamps dai lôr stanziaments nancje plui tart, cuant che, daûr di ce che a disin i storics, si cjatavin dal sigûr tai nestris paîs. Vadì parcè che a varan usât brusâ i cadavars, no je stade cjatade nancje une tombe celtiche; e altris vanzums de lôr industrie no saran restâts  par vie che i Celtics no si slontanarin plui dal Friûl, ma a restarin dulà che a jerin, trasformant un pôc a la volte la industrie e lis costumancis lôr daûr di chês dai popui che ju tignivin sot. Par altri ultimementri e je stade scuvierte une antighe citât celtiche sul Magdalensberg, in Carinzie, sapulide sot lis maseriis di une altre citât che i Romans a vevin costruide parsore; e al pues stâi che, cul timp a lâ, cualchi cjosse interessant e puedi vignî fûr ancje in Friûl. Sigûr che, doi secui denant di Crist, cuant che i Romans a implantarin Aquilee, i Celtics carnis a jerin parons de regjon: no trop fis, ma sparniçâts scuasi pardut.