JENTRADE
di Josef Marchet

Ducj si lu sa che la storie, come che e ven spiegade tes scuelis, e à plui parintât cu la "educazion nazionâl" che no cu la veretât. A son i parons dal vapôr che a stabilissin ce che al va contât e ce che al va tasût: baste pensâ a Napoleon o al nestri gloriôs "menedôr". E ogni volte che la vuere politiche e mude direzion, a scuegnin mudâle ancje i libris di storie: la veretât e à tantis musis che si vûl se si sa parâle ator daûr dal aiar che al sofle e metile al servizi de politiche!
I scuelârs di chestis anadis lu viodin e lu san. E je une sole robe che no mude, la plui ridicule e antisociâl di dutis: il spirit nazionalistic che al cîr di dâ di intindi a ognidun che il so paîs e la sô int a son i prins, i plui grancj, i plui brâfs dal mont. Pai Francês la France e je il braç di Diu: Gesta Dei per Francos; pai Todescs il gjermanic al è l'Herrenvolk il popul paron dal mont; pai talians e je la veretât santissime il "Primato morale e civile degli italiani". E Diu vuardi a no crodi! Cui che nol crôt a chestis robis, nol pues jessi pront a fâsi sbudielâ pe patrie: e chest al impuarte plui di dut a ogni guvier!
Cuintri di chest stupit malcostum e salte fûr, ogni tant, une vôs velegnose che e sgnache in muse a la storie uficiâl juste chês robis che la storie uficiâl e cîr simpri di tignî taponadis. Par cont di noaltris al baste menzonâ "La lotta politica in Italia" di A. Oriani, fanatic e fassist denant da la ore, ma a so mût cuintri riformist; "Il fantasma liberale" di G. Colamarino; e ultime e plui furiose di dutis, la "Antistoria d'Italia" dal triestin F. Cusin.
Nol è di dî che in chescj libris si puedi cjatâ un vanzeli, o une obietivitât di meti la man sul fûc: a fuarce di volê lâ cuintri il conformisim uficiâl, a colin intun conformisim contrari. Ma un grum di veretâts coragjosis si cjatilis, e, se no altri, si à la sodisfazion di viodi almancul cualchidun a petâ cul picon intor di une costruzion impastade di luianiis.
La storie dal Friûl, par fortune, tes scuelis no si insegnile: cui sa ce mignestre che e vignarès fûr! Ma, o pôc o trop, sui sfueis, tai discors, in cualchi libri, si tirile in bal: nancje di dîlu, in sens nazionalistic. Veretâts dogmatichis fondamentâls:
- la grandece e civiltât dal Friûl e fo opare di Rome;
- la salvece dal Friûl cuintri la barbarie todescje e fo merit di Vignesie;
- la plui grande brame e fortune dal Friûl e fo chê di jessi unît ae Italie.
Rome, Vignesie e la Italie a forin chês che nus puartarin ogni ben: onôr, glorie, civiltât, prosperitât, potence e vie indevant. Conclusion: noaltris o scugnìn jessi lis "sentinelis" intrepidis de Romanitât, de Venezianitât, de Talianitât cuintri i lôr tradizionâi aversaris; e fâsi copâ. E se o provassin a fâ un fregul di cuintristorie dal Friûl, lassant di bande dutis lis sflocjis e i prejudizis, e contant ancje chês robis che ai "parons" no vadin masse a scuare? No par cjoli di man lis armis a lis "sentinelis", ma parcè che e je ore che ognidun al fasi ce che al crôt so dovê cuntune cussience plui drete e positive e no par efiet di bufulis propagandistichis.