CHEL DAI SPIRONS DI AUR
di Josef Marchet

La republiche di Vignesie e tirà il sghiret il mês di Mai dal 1797. E veve comandât in Friûl par 376 agns e cualchi mês: in dut chel timp e jere rivade adore di ridusilu come un peçot sbrindinât. No si jere contentade di gjavâi sanc di dutis lis bandis: i veve distudade la anime. Nissune memorie plui de antighe indipendence, nissune brame di tornâ a vêle; nissun furlan che al ves podût fâ alc di bon, se no sgarfâ tes cjartis dai archivis un fregul di storie e presentâle ben morestade a un public impegnât in peteçs, in luianiis; nissun om di biel inzen che al ves podût doprâlu altri che a fâ viersuçats di Arcadie e sunetessis par cualchi predicjadôr di cuaresimâl; la nobiltât scomparide o imbastardide midiant i matrimonis cui arlechins des fameis di buteghîrs de Serenissime; la gnove nobiltât, rivade di là, imberdeade tai vizis e tai sporchets dai cavalîrs servents; il popul instupidît te sô miserie e cence sperance di podê mai plui gjavâsi fûr; la Regjon interie cence une difese, cence une fuarce, cence une dignitât. A jerin aromai secui che la maraveose citât e platave, sot la vernîs des sôs pieris e dai siei carnevâi cence fin, une vecjaie che i roseave i vues e i faseve fraidessi la polpe; a jerin secui che e veve bielzà imparât a vivi cu la industrie dal forest, al ven a jessi spelant i dordei che a capitavin di ogni bande a gjoldi lis sôs fiestis e a cognossi lis sôs pelandis inscueladis, e turclant cence pietât i “fedelissimi distrittuali” de Tiere ferme.
Di là de stangje – che le contin cemût che a vuelin i turiferaris iredentiscj – il guvier de la Austrie al jere stât plui svelt e plui onest. Gurize, di un cjistielat che e jere sot i siei conts, e jere deventade une citadine di gale, cui siei palaçs, cui siei zardins e une vite cetant plui facile e comude. I furlans di là, se a vevin un fregul di cjâf e di spirt, a cjatavin la strade vierte par Viene e no ur mancjavin ni lis pussibilitâts di butâsi fûr, ni lis sodisfazions. E no forin pôcs chei che si faserin onôr.
De bande di ca, invezit, al è dome Udin che al pues tignî in bon di vê vût cualchi stamp di grandece, in chei secui, par vie che cualchi luctignint ambiziôs al bramà di scrivi il so non suntune piere, e cualchi siôr di là, dopo comprât il titul di un nobil furlan ruvinât, al pensà di implantà chenti un fregul di chê borie che nol podeve mostrâ a Vignesie. Ma al è vonde pôc par un timp cussì lunc.
Dal 1797 Vignesie e lassà che Napoleon (1) – un gjenerâl di 28 agns! – al puartàs la vuere cuintri da la Austrie sui cjamps de Furlanie, che i francês a fasessin man basse di ce che a cjatavin di miei tes glesiis o tai palaçs, che a mangjassin e a bevessin a spalis de puare int. E Napoleon, tornant indaûr di Leoben, le ringrazià mangjantle jê intune bocjade. Po dopo, pestant i pîts tal palaç dai Manins di Passarian e in chel dai Florios a Udin, se lassà gjavâ di bocje e le bandonà in man da la Austrie cul pat di Cjampfuarmit. Dopo doi agns a rivarin i cosacs di Suvarow a disvuedà lis panariis dai Furlans, po a tornarin i francês a cjastiâju di vêlis lassadis disvuedâ.
Dal 1805 al passà Massena (2) e il Friûl, cu la pâs di Presburc, al deventà “Dipartiment di Passarian” sot dal “Regno Italic” di Napoleon. Dal 1809 e tornà la Austrie cui arcabûs dal Arciduche Zuan; ma i tocjà di spesseâ a tornâ indaûr par difindi la capitâl, lassant il Friûl semenât di cadavars. Dal 1813 une altre sopressade e scovà vie par simpri i francês e il congrès di Viene nus lassà sot da la Austrie une altre volte. Sot di chestis montanadis i Furlans lis cjaparin di chescj e di chei, cjantant tedeums mo par chei mo par chescj, paiant contribuzions e sopuartant recuisizions, robariis, mangjariis e liberazions a cjadene.