VIGNESIE E I PATRIARCJIS
di Josef Marchet

La ocupazion dal Friûl par man di Vignesie e scugnive fâ nassi fuartis reazions: il stât patriarcjâl al jere, almancul juridichementri, une part dal imperi e un principât feudâl in man de glesie: e Vignesie, republiche indipendent, lu veve usurpât. Ma l'imperadôr Sigjismont al veve il so ce fâ par vie di berdeis ancjemò plui grues e la sô oposizion cuintri Vignesie no fo ni pronte ni ghiarde, e no puartà nissun risultât positîf. La curie romane invezit subit dopo sistemade la cuestion dal sisme di ocident, si fasè sintî: za tal Setembar dal 1420 il pape Martin V al mandà une imbassade a Vignesie, domandant che il Friûl al vignìs tornât al patriarcje; nol rigjavà nuie.
Chel an dopo al scrivè une letare tornant a bati chel cantin: Vignesie e rispuindè che e veve lis sôs resons par no contentâlu, che al plui e varès lassât al patriarcje il guvier temporâl di S. Vît e di S. Denêl e i varès passât, come indenitât, trê mil ducâts ad an.
Intant il patriarcje Luduì di Teck si mostrave contrari a cualunche intese e al cirive di fâsi judâ dal imperadôr a tornâ paron dal Friûl: si capìs che intant al seguitave a governâ chê part dal patriarcjât di là des monts, fintremai su la Drau, che no jere stade cjapade. Dôs voltis (1422 - 1431) al comparì in Friûl cun cualchi miâr di mercenaris ongjarês, cjapant Manzan, Rosacis, Scluse e rivant fin sot Udin. Ma i mercenaris di Tadiu di Este e dal cont di Carmagnole lu pararin indaûr. A forin fatis un grum di crudeltâts di une bande e di chê altre; e i Furlans che a vevin judât il patriarcje a forin ben cjastiâts.
Alore Luduì al presentà la cuestion al Concili di Basilee, che al mandà la scomuniche al guvier di Vignesie (1435). Il pape Eugjeni IV che nol viodeve di bon voli il Concili, al spesseà a smolâ une assoluzion. Pôc timp dopo al murì, a Basilee, il patriarcje Luduì, e il Concili al nomenà patriarcje Sandri di Marzovie, che al jere vescul di Trent. Il pape, par cont so, al nomenà invezit Luduì Trevisan che al jere di Vignesie: e cussì si capìs cemût che e veve di lâ a finî. Il Trevisan al spesseà a rinunziâ a ogni dirit temporâl sul Friûl sore une buine indenitât in ducâts e il mês di Jugn dal 1445 il marcjât al jere fat.
Ma Vignesie no jere, ancjemò no, contente: e veve tal so teritori doi patriarcjis - chel di Aquilee e chel di Grau - e il so vescul al jere sufragani di Grau! Cussì e navigà tant, cun Rome, che dal 1451 e rivà adore di puartâsi in cjase il patriarcjât di Grau che al deventà patriarcjât di Vignesie, lassant te basiliche di Elie un plevanut cualunche. E cutuardis agns plui tart e domandà la sopression dal patriarcjât di Aquilee e la istituzion di doi vescovâts, un a Udin e un a Cividât.
No vint podût otignî chel tant, Vignesie si contentà di fâ in maniere che il patriarcje al fos simpri un dai siei citadins. E culì al scomence un rosari di manovris di ogni fate, par no lassâsi scjampâ di man chel "cadreghin". A forin un cuindis i patriarcjis vignûts dopo dal Trevisan, ducj jessûts des grandis fameis di Vignesie, ducj devotissims de Serenissime e pronts a fâ i siei interès. Nissun o dibot nissun al restà te sô residence, ma a lassarin il Friûl tes mans dai lôr vicjaris. Si passavin il patriarcjât di barbe in nevôt, nomenant cualchi nevôt coadiutôr cun dirit di sucession, par no lassâ jessi di famee la cariche, come se e fos stade in lôr possediment privât: cussì i Grimans, i Barbars, i Gradonics, i Dolfins. Si pues dî che nissune des nominis dai patriarcjis di Aquilee, fatis dopo il Concili di Trent, no fo fate secont lis prescrizions dal Concili: si pues sostignî, cul Dirit Canonic in man, che a forin dibot dutis ilegâls e invalidis, ancje se Rome e lassà cori par doi secui une cjosse cussì scandalose.
Si capìs che i imperadôrs a protestarin e si sfuarçarin di rompi cheste cjadene vergognose di usurpazions fatis tal interès de republiche e in barbe aes leçs dal Concili. La plui part dal teritori patriarcjâl e jere ancjemò sot da la Austrie, massime dopo dal tratat di Noyon (1516), comprendude la sede titolâr di Aquilee; invezit la plui part dai vescui sogjets a la autoritât metropolite dal patriarcje e jere di ca des monts. I imperadôrs a domandavin che, almancul une volte ogni tant, il patriarcje al fos un dai lôr paîs e no simpri un venezian. E viodint che midiant de diplomazie no rigjavavin mai nuie, a cirivin di sfuarçâ la man a Rome cul impedî ai patriarcjis di visitâ chê part de diocesi che e jere di là e ancje cul improibî ai predis todescs di ricognossi i patriarcjis e di ubidîur.
Nancje chest nol valè nuie: e l'unic risultât al fo chel di viodi une buine part dai fedêi cence pastôr, bandonâts al disordin morâl e ancje ae propagande protestante. Rome, pitost di fâ un displasê a Vignesie e lassà lâ, par secui a lunc, un grum di animis al lôr destin. E dopo e finì cul contentâ tant Vignesie che Viene a spesis dal Friûl: al ven a jessi cul abolî il patriarcjât di Aquilee, dividint il teritori in dôs diocesis, metint un arcivescul a Udin par chê part che e jere sot Vignesie e un a Gurize par chê che e partignive a la Austrie.
Cussì, juste cumò dusinte agns (1), il mês di Lui dal 1751, ancje chest ultin vanzum di grandece dal Friûl, chest ricuart di timps di sflandôr e di indipendence al restave sacrificât par colpe de politiche e par opare di potencis forestis che a faserin i lôr interès su la piel dal furlan.