LA FIN DAL PATRIARCJÂT
di Josef Marchet

Par une cuarantine di agns, la politiche di Vignesie - si scuen dîlu - e fo paziente e furbe. No 'ndi voleve tropis a ocupâ il Friûl in chê volte de vuere disastrose pal patriarcje di Alençon (1381-1394) o sot il guvier di Zuan di Moravie (1388-1394) o in altris ocasions; ma une azion direte di Vignesie e varès dal sigûr dismots i scrupui di Rome e dal imperadôr e lis gjelosiis dai Visconts, dai Fiorentins, di Verone. Il Friûl al jere un dai unics stâts eclesiastics in Italie e un dai plui impuartants principâts feudâi: Rome e l'Imperi no lu varessin lassât restâ intes mans di Vignesie cussì pes matis. Si pues crodi che la Serenissime e vebi pensât di spietâ che il piruç madûr al colàs di bessôl, contentantsi di dâ, ogni tant, une scjassadine al piruçâr.
I Savorgnans a forin la sô sgrife e i siei agjents intal patriarcjât; Udin al jere, si pues dî, intes mans dai Savorgnans in chei moments burascjôs, e al ubidì aes diretivis che a vignivin di chê bande, in chel mentri che altris comunitâts, come Cividât, Glemone, Tumieç, a mostrarin di capî plui ben la situazion e di volê passâ parsore di cualchi diference, tratantsi di salvâ l'indipendence dal Friûl.
Cussì a passarin i agns tra vueris di cjistielans e di Comunitâts pro o cuintri i patriarcjis e tra di lôr, indulà che lis risorsis de regjon, la fuarce, la pazience de int a forin straçadis; lis tavielis devastadis; i racolts lâts malementri; purtrop vilis o cjistiei brusâts; une vore di int muarte; ogni ricjece scomparide par man des masnadis di soldadats di venture che a corevin ca e là pe regjon. Vignesie e cirive simpri di vê un arbitrât fra i contindints par imponi condizions daûr i siei plans, e Udin cui Savorgnans i tignivin man. Cussì, plancut plancut, e faseve valê la sô autoritât e la sô volontât in dutis lis nestris facendis. A tignî turbidis lis aghis a judavin ancje i conts di Gurize e i Cararês di Padue.
Si rivà, tra balfueriis di ogni fate, fintremai al 1417. In chel moment la Glesie e jere dute sbregade par vie dal Sisme ocidentâl: a jerin trê papis e nissun al capive cuâl che al jere chel just; il Concili di Costanze al jere cjapât a disgredeâ il glimuç e nol veve timp di abadâ a rognis di altri gjenar. Sigjismont di Lussemburc, re di Ongjarie, nol rivave adore di fâsi ricognossi imperadôr cuintri so fradi Vincislau e so cusin Jost, e al veve il so dafâ par vie di une rivolte religjose in Moravie. Patriarcje di Aquilee al jere Luduì di Teck nomenât dal re Sigjismont, ma no confermât ancjemò di nissun pape: al veve cirût altris dôs voltis di deventâ patriarcje e nol jere nancje predi. La sô politiche, cence direzion nete, cence inteligjence, cence risoluzion, e restà in sostance leade daprûf di Sigjismont, che nol veve timp ni mieç di sostignîlu avonde, imberdeât come che al jere in mil imbrois (2).
Vignesie e pensà che al fos rivât il moment bon par slungjâ la çate. Cu la scuse che il gnûf patriarcje al jere in leghe cun Sigjismont e Sigjismont al jere in vuere cun jê, e tacà l'invasion dal teritori patriarcjâl. No fo une imprese tant facile: i Furlans - Comunitâts e cjistielans - judâts a tratis dal cont di Ortemburc e da cualchi trop di Ongjarês, a tignirin dûr fintremai che ur vanzà flât. Il patriarcje, scjampât a cori daûr dal re par vê jutori, ju lassà tai pastiçs. Cussì tra la vierte e l'istât dal 1420, a un a un, cjistiei e paîs a scugnirin molâ. Ogni cjistielan e ogni Comunitât al tratà cun Vignesie par so cont: i cjistielans a domandarin il ricognossiment des lôr prerogativis, lis Comunitâts il mantigniment dai lôr statûts, il Parlament la conservazion dai siei dirits e regolaments. Vignesie e prometè dut, fasintsi paiâ grassis indenitâts di cui che nol voleve jessi sachizât dai siei soldâts.
Cui 3 di Otubar di chel an malandret, e colave la ultime resistence a Plêf di Cjadovri e la indipendence dal Friûl e finive, dopo vot secui e mieç di vite (578 - 1420). I Furlans, obleâts a pleâsi, salacor a pensavin che si tratàs di une burascje di passaç, come che a 'ndi vevin provadis altris; invezit no cjatarin plui la fate di dreçâsi: Vignesie ju tignì sot par plui di trê secui e mieç, e dopo si derin di volte altris parons.