I PATRIARCJIS TALIANS
di Josef Marchet

Dopo muart Pertolt di Andechs, il Stât furlan al colà tes mans di patriarcjis talians, che lu governarin par otante agns seguitîfs: 1252 - 1332. Chescj a forin : Grivôr di Montlungje di Ferentin, Raimont de Tor di Milan, Pieri Gjere di Ferentin, Otobon dai Rovârs di Plasence, Gaston e Paian de Tor di Milan.
A forin timps turbits e tribulâts pai nestris paîs e pai stâts confinants de Italie e de Gjermanie; e nol è pussibil fâsi un judizi positîf e une stime sigure sul cont da la opare di chescj patriarcjis. Ma, fossie o no fossie colpe lôr, il Stât patriarcjâl che fintremai in chê volte, magari tra confusions e balfueriis di ogni fate, al jere lât slargjantsi e saldantsi, cun chescj governants al scomençà a discjadè, a disfueâsi e a strenzisi. La politiche ghibeline dai patriarcjis todescs, vuadagnant il favôr dai imperadôrs, e zovà pratichementri al Friûl, che al cresseve di bot ogni an, di teritori e di concessions. La politiche papaline dai talians i fasè pierdi chest favôr, cence nissun vantaç de bande dai Vuelfs. Cun di plui che i talians, massime i doi Torians, Raimont e Paian, a doprarin lis fuarcis e lis risorsis dal Friûl par judâ i interès de lôr famee in Lombardie, tes sôs vueris cuintri i Visconts. La Curie papâl di Rome e di Avignon, sore de nomine che ur deve, ur domandave une sume cussì gruesse che no rivavin mai adore di paiâle: e alore ur mandave filipichis e sospensions. Cussì, tra lis spesis militârs pai interès de lôr cjasade, i "servizis" di paiâ ae Curie e i onoraris ai lôr vicjaris, cjapitanis gjenerâi e altris lôr dipendents, a scugnivin ogni altre dì meti sù tassis ai lôr ministeriâi e al popul, e instès no vevin mai avonde bêçs. Par tignîsi sù, cuintri il partît imperiâl che al veve simpri i siei fedêi tra la nobiltât furlane, chescj patriarcjis a menavin daûrsi un grum di gramulis dai lôr paîs e ur metevin in man incarichis e uficis tant di glesie che di guvier, causant une vere invasion ce di bassarûi ce di lombarts, in Friûl. E cheste no fo la ultime cause des ribelions e des leghis de nobiltât cui nemîs dai patriarcjis.
Al scomençà Grivôr di Montlungje a menâ o clamâ chenti une schirie di meridionâi de Campanie; al consegnà in apalt doganis e tassis a Toscans, par tirâ fûr carantans; al spalancà lis puartis de regjon ai talians par fâ un cuintripês ai todescs che si jerin, di un pieç in ca, implantâts chenti; al leà la Furlanie ai interès dal partît papalin da la alte Italie; e tal so testament al lassà dibot dute la sô robe ai amîs meridionâi. Raimont de Tor, cu la sô ande di ditatôr al decretave di mudâ di puest un paison come Glemone e di metii non "Milanraimont", ma in pratiche, come vescul no 'ndi cumbinà une di drete, e come princip al imbastì une falope parsore chê altre: al implenà il Friûl di cusins e di nevôts, al cedè Vençon a Mainart di Carinzie, al judà Gjerart di Cjamin che al veve nome gole di fâsi paron dal Friûl e al menà i Furlans a fâsi sbudielâ dai Visconts par tornâ a meti in pîts la sô famee a Milan. Pieri Gjere par mieç di so nevôt Nicolau al cedè Sacîl a Gjerart di Cjamin - Siôr di Trevîs dal 1283 al 1307 - (il "buon Gherardo" dissal Dante!) e nol rivà adore di fâ di piês par vie che al murì dopo doi agns di guvier. Otobon dai Rovârs al fo un leon: cuant che Indrì di Gurize e Rizart di Cjamin (il fi di Gjerart) a devastarin il Friûl, lui al scjampà di scuindon; al lassà che Vignesie i puartàs vie i dirits su lis citâts da la Istrie e che Rizart al deventàs so cjapitani gjenerâl; e ancje come diplomatic, tal cirî di convinci chei di Bressie a vierzi lis puartis al imperadôr Indrì VII, al fasè une ficjace cence costrut. Gaston de Tor al colà di cjaval e al murì pe strade, biel vignint in Friûl: ma al jere bielzà rivât adore a nomenâ so vicjari il fradi Rinalt. Paian de Tor, nevôt di Raimont e barbe di Gaston, al seguità l'esempli dal stes Raimont, menant i Furlans a batisi cuintri i Visconts, intant che i todescs a devastavin il Friûl restât cence difese (1324): e il timp che lui al governà culì, al fo salacor il plui braurôs dal patriarcjât, pes disconcuardiis e pes vueris che a faserin tribulâ paîs e vilis in dute la Furlanie.
Nol covente dî che il merit di vê intalianade la regjon, pai nestris storics, al va parsore di ducj i malans causâts di chescj patriarcjis.