IL PARLAMENT
di Josef Marchet

L'ordenament politic dal Friûl tra il Dusinte e il Tresinte al cuistà une sô forme, che e serf di maravee ai storics nostrans (e a chei talians, chês raris voltis che ur capite di interessâsi des nestris facendis). Ma se a vessin la complasence di slungjâ une voglade su la storie dai Stâts feudâi de Gjermanie, vadì che lis lôr maraveis si sfantaressin. Al è naturâl che in trê secui di guvier dai patriarcjis todescs, la nestre "Patrie dal Friûl" - juste in chê volte e scomençà a clamâsi cussì - e vebi cjapât il stamp di un principât gjermanic.
Lis dôs istituzions plui diferentis dai ordenaments talians, sot il guvier dai patriarcjis, a forin lis Comunitâts e il Parlament.
Lis Comunitâts dal Friûl no àn nuie ce fâ cui Comuns de Lombardie, dal Venit, de Toscane, ni par vie di cemût che a son nassudis, ni par vie di cemût che si guviernavin. No si formarin di bessolis a dispiet dal patriarcje lôr princip, no forin, par lôr nature, in contrast cu la sô autoritât, no cirivin mai di vê une indipendence cussì largje come i Comuns talians. Nol jere nancje pussibil che l'ordenament comunâl talian, a forme republicane, si implantàs chenti, indulà che i paîs plui grues, come Cividât, Glemone, S. Vît o Sacîl, a podevin vê, rive e no rive, trê mil animis. A forin i patriarcjis stes a dâur un ordenament comunâl sul finî dal secul XII; e chest ordenament al fo di chê sorte stesse di diviersis citâts da la alte Gjermanie. A vevin i lôr conseis, a fasevin lis lôr leçs e i lôr statûts, a sielzevin i procuradôrs, i massârs, i cjamerârs e i funzionaris, a aministravin la justizie sui lôr sogjets; ma lis cuistions plui impuartantis e di interès gjenerâl no lis tratavin di bessolis, lis tratavin mediant dai lôr deputâts tal Parlament de Patrie; e in ognidune al jere un rapresentant dal patriarcje.
Ancje il Parlament al jere formât sul stamp des assembleis feudâls de Gjermanie. No si pues dî cun precision cuant che al scomençà a funzionâ, ni cemût che al funzionave tal prin. In Italie no si cjate nissun esempli di cheste fate. Facilmentri i patriarcjis, ancjemò tal XI secul, a varan tacât a clamâ dongje i lôr feudataris, ogni volte che al jere par aiar alc di grues, par sintî la lôr opinion e par intindisi sul cont de "taie" feudâl (che al ven a jessi sul numar dai soldâts e dai cjavai che a podevin mandâ tal esercit patriarcjâl) e su la division dai contribûts in monede, che a vignivin a coventâ in câs di vueris o di altris cjossis impuartantis. Si tratave di une assemblee consultive (1), duncje, come che a 'ndi jere altris di là des monts e come che al jere, in chê volte, ancje il Parlament inglês. Cu la formazion des Comunitâts, ancje i deputâts di chestis a jentrarin a fâ part dal Parlament; e alore la assemblee e cuistà un andament plui regolâr e une plui alte impuartance sul guvier de "Patrie". No veve ancjemò un sît stabil pes adunancis, ni une regule pes convocazions: il patriarcje le clamave adun ogni volte che al veve dibisugne di intindisi. Ma il Parlament, un pôc a la volte, al deventà ancje un tribunâl che al tratave lis causis tra il patriarcje e i siei feudataris ministeriâi, lis ribelions, e i delits cuintri la pâs dal Stât; al tratave in apel lis sentencis de curie patriarcjâl in materie di dirits feudâi e, in tierce istance, lis sentencis dai podestâts, gastalts o judiçs des Comunitâts: fintremai che la autoritât dal Parlament e rivà su dutis lis cjossis che a dipendin dal podê statâl: tassis, milizie, difese, fortificazions, prestazions di ogni fate; fin a controlâ il stes patriarcje e meti adun un vêr codiç di leçs pe Patrie - lis Costituzions de Patrie dal Friûl - a tratâ cun princips e Stâts forescj,cence nancje dipendi dal patriarcje. Par fâle curte, il Friûl, tal secul XIV al rivà a vê un guvier pôc o trop costituzionâl, come che e rivà a vêlu la Ingletiere cu la Magna Charta Libertatum. In nissun sît di dute la Italie nol esisteve, in chei timps, un Stât grant come il Friûl, che al ves vût un guvier di cheste fate.