FORMAZION DAL PATRIARCJÂT
di Josef Marchet

Dopo de tampieste dai Ongjars il Friûl, dibot par cinc secui, al reste distacât dal ambient talian e al va a fâ part dal ream gjermanic. Si capìs che, restant gjeografichementri di ca des monts, al restà ancje leât cul mont culturâl latin plui che no lis regjons di là de Donau, ma la sô vite politiche e fo chê di un Stât feudâl todesc.
Cheste situazion e scomence a formâsi sot dal imperadôr Oton I. Il marchesât furlan, ridusût in maseriis e unît cu la Marcje di Verone, al passe tes mans di Indrì di Baviere; e po il ducât de Carinzie, cul Cragn, il Staiar, la Istrie e il Friûl, al ven distacât de Baviere. Cussì l'Herzog di Carinzie al comande ancje de Marcje veronese e de Furlanie, indulà che al comparìs, sì e no, cualchi volte un Cont che nol conte nuie. Chel che al conte simpri plui devant dal Imperadôr al è il Patriarcje di Aquilee.
Al veve za tacât Berengari a fâ cualchi donazion di terens al Patriarcje Fidrì (900-904); ma la prime investidure impuartante e fo chê dal imperadôr Oton I, che dal 967 al meteve tes mans dal Patriarcje Rodoalt dut il teritori furlan tra la Stradalte e il mâr, di Cervignan fintremai ae Livence, cence contâ altris concessions ca e là. Une vore di donazions di terens e paîs intîrs al fasè ancje Oton II, tant a Rodoalt che a Zuan, e ancjemò plui Oton III, massime des bandis di Pleç, Tulmin, Gurize e sul Vipau.
Al ven a jessi che, intor dal an 1000, la jurisdizion dal Cont dal Friûl e jere dute semenade di possessions dal Patriarcje e chestis a deventarin simpri plui largjis e numerosis, in maniere che la paronance dal Cont, prime rote di tantis isulis di domini Patriarcjâl, e finì, un pôc a la volte, cul ridusisi in cualchi isule pierdude tal teritori dipendent dal Patriarcje. Si sa che cheste e fo pardut la politiche dai trê Otons (3): meti lis jurisdizions feudâls tes mans di umigns de Glesie par no che a deventassin ereditariis tes fameis dai Conts e par podê tignî leâts cun cheste cjavece vescui e abâts.
In chest timp une largje fasse di teritori disore e disot de Stradalte e scomence a popolâsi di paisuts che a àn un non sclâf: Gurìs, Guricìs, Grediscje, Gridiscjute, Rividiscje, Stracis, Belgrât, Sante Marize, Sante Marizute, Vuirc, Listize, Çupicje, Sclaunic, Samardencje e vie indevant. Cheste e jere la part de Furlanie che e veve patît di plui par vie dai Ongjars: si viôt che in chei sîts al veve di sei restât dibot un desert e che i Sclâfs des monts a soreli jevât, o invidâts o lassâts vignî dai Patriarcjis, a capitarin a tornâlu a popolâ. E chescj paîs, par ordin che a nassevin, a passavin sot la jurisdizion dai stes Patriarcjis (Diplome di Oton III al Patriarcje Zuan, 1001) (4).
Fintremai al timp dal Patriarcje Popon no si pues dî cun sigurece di ce nature e cun ce estension che e fos cheste jurisdizion: se al Cont al restàs ancjemò cualchi dirit o nuie. Ma cun Popon (1019-1042) la cuistion si definìs, parcè che dal 1027 l'Imperadôr Conrât II (5) al declarà che i paîs, i cjistiei, i terens e lis personis che a jerin sot dal Patriarcje no dipendevin in nissune maniere ni dai Conts, ni dai Marchês ni dai funzionaris imperiâi: al ven a jessi che il Patriarcje al jere feudatari di prin grât, dipindint nome e diretementri dal Imperadôr; cun di plui il stes Conrât al deve a Popon il dirit di bati monede, che al vignive a significâ une vere sovranitât. Cussì si pues dî che il Principât temporâl dai Patriarcjis di Aquilee al jere nassût.