BERENGARI L’UNITARI
di Josef Marchet

La ore nere dal Friûl e capitâ juste sot i Francs, dopo muart Carli il Grant. Cun chest imperadôr, cul Patriarcje Paulin e cul duche Everart al pâr che lis robis si fossin inviadis avonde ben. I malans a scomençarin cun Berengari, secont fi di chest Everart, che al deventà duche o margrâf dal Friûl dal 875. (Tai documents al è clamât tant “marchio” che “dux” e no si pues dî se, in chest timp, la diference tra il titul langobart e il titul francon e compuartàs diferencis di jurisdizion). Berengari, cun dutis lis buinis e tristis venturis che i capitarin, al durà un pieç a lunc – magari cussì no! – dibot cincuante agns (875-924). Cu la sô brame di unî dute la Italie sot la sô paronance, cu la sô gole di deventâ re di Italie e imperadôr cun dutis lis vueris che al fasè e lis vuadulis che al cjapà, al trascurà simpri ducj i interès dal so ducât, anzit ju sacrificà tantis voltis aes sôs masse grandis ambizions. I scritôrs de storie di Italie lu laudin une vore pal so sfuarç unitari: noaltris furlans o scugnìn ricognossi in Berengari la colpe di une des plui spaventosis calamitâts de nestre tiere.
Dopo vincjecuatri agns di cuistions e di balfueriis di ogni fate cui siei cusins o barbis – rês o imperadôrs di France o di Gjermanie o golôs, come lui, di deventâ – l’ultin an di chel secul si cjatà denant di une sdrume sproposetade di Ongjars (la int plui salvadie e besteâl che mai e sedi passade par ca) che a vignivin de Panonie e che a rivarin fintremai a Pavie di Milan. Berengari nol rivà a fermâju e co ju tacà, che za di bessôi a tornavin indaûr cjamâts di robarie, lis cjapà fin sul vues. Dopo di chel an a tornarin plui voltis cence che mai Berengari ur taiàs il pas, anzit cualchi volte clamâts di lui, pes sôs bielis impresis. Deventât imperadôr provisoriementri dal 915, lui no si de nissun pinsîr dal Friûl e lu lassà in man ai siei partesans, bogns di nuie, che plui tart lu tradirin, ma che a lassarin cori pe nestre tiere lis mandriis dai Ongjars ogni volte che ur saltà il gri di vignî.
No si sa un dret cetantis voltis che chescj cjastîs di Diu si strucjarin ca in Friûl: al pâr che a usassin spietâ, tra une incursion e chê altre, il timp che al bastave par che la int ur ves preparât alc di ce robâ. A vignivin pe solite strade di soreli jevât; a passavin fûr par mieç de Basse, dulà che e je ancjemò la Stradalte che, dopo di chê volte, e fo clamade Ongjaresche (strata Ungarorum) e dute la campagne disore e disot par un grant toc e cjapà il non di “vastata Ungarorum”. Ma si pues crodi che dute la planure furlane e sei stade, ce pôc ce trop, dispueade e spopolade di chês sbilfis e che mai, in tancj secui di invasions e devastazions che sopressarin il Friûl – nancje cun Atile – la nestre regjon no vebi presentât un spetacul di desolazion compagn. Si podarès, tant che si vûl, dividi la storie furlane in dôs parts: prime dai Ongjars e dopo dai Ongjars, parcè che, di dut ce che al jere stât fat prin, nol restà altri che i vanzums sapulîts sot tiere, che i Ongjars no vevin timp di lâ a sgarfâ.
E fo une fortune pai paîs e pe int da la Alte, di cjatâsi a jessi puars e fûr di man: cussì a forin sparagnâts ancje di cheste disgrazie, midiant che i invasôrs no vevin timp di pierdi dulà che al jere pôc ce robâ e i parons a podevin resisti. Nome su la metât di chel secul l’imperadôr Oton al rivà adore di rompi lis cuestis ai Ongjars e di fermâ la tragjiche usance che a vevin cjapade.