GRAU
di Josef Marchet

Grau e je la uniche isule abitade de regjon furlane, e no je furlane ni pôc ni trop; e si ten in bon di no jessi. Che e vedi vût cualchi abitant prin dal 400 al pues ancje stâi, ma nol risulte.
Facil che lis primis staipis di palût a sein stadis fatis a Grau in chê volte che al rivà Atile a sdrumâ Aquilee. E no ducj chei siôrs aquileiês che a jerin scjampâts là jù, a tornarin indaûr dopo passât il burlaç: putrops di lôr no vevin plui cjase te citât e se faserin su la isule. Ma il grues al rivà là cuant che Aquilee e colà tes mans dai Langobarts. Si pues crodi che i prins a puartâ la pielate al sigûr a sein stâts i plui siôrs, i parons Latins - come simpri - cundut il patriarcje Paulin che al rivà adore di puartâsi daûr il tesaur de sô glesie. E chei no tornarin. In pôc timp une altre citât, cui siei palaçs e lis sôs glesiis e comparì su lis bariduris: si tratave di siôrs! La cuistion dai "Trê Cjapitui" e finì cul dividi il patriarcjât: in Aquilee (o a Cividât) un patriarcje sismatic, favorît dai Langobarts; a Grau un patriarcje unît sot la protezion dai bizantins. Cussì lis dôs citâts a deventarin antagonistis: une "civîl" e une "barbariche".
E la sbregadure no fo mai plui cuside. Intant che Aquilee e colave a flics, Grau al cresseve di impuartance e di autoritât; e jere la prime des isulis dal litorâl adriatic che a lavin popolantsi sot la dominazion bizantine. Ma la fieste no durà a lunc. Grau, nassût, si pues dî, des maseriis di Aquilee al jere destinât a fâsi scolâ di sanc de furbarie di Vignesie.
Tra la prepotence dai patriarcjis todescs di Aquilee che a volevin fâsi parons, e la politiche fine dai dôs di Vignesie, che le cjarinavin par tignîle buine, la isule e sielzè Vignesie. Cussì, par secui, intant che la Furlanie e fo une code dal mont gjermanic, Grau si tignì in bon di sei une ponte dal mont latin. Al pierdè dut, un pôc a la volte; al restà in man di patriarcjis natîfs di Vignesie, che lu guviernavin stant a Vignesie; al passà sot i conts nomenâts di Vignesie, che no judavin in nuie e no ju difindevin di nissun assalt; al sopuartà cjaristiis, epidemiis e incursions; si ridusè te plui nere miserie, di no podê nancje justâ il cuviert dal palaç dal cont: ma di tornâ a tacâsi al so çoc furlan nol fo mai câs. Cussì, vitime de sô stupide fedeltât a cui che in premi lu disvuedave di dut, si lassà puartâ vie ancje la sede patriarcjâl e dopo nol fo nuie plui che un grop di cjasis discrodeadis, di tamossis tiessudis di cjanusse, e un popul di pescjadôrs danâts a strussiâ la vite ta la aghe e tal pantan e a murî di stents prin da la ore. I restà la braure di clamâsi mari di Vignesie e di fevelâ un lengaç diferent dai "barbars" di tiere ferme.