LA DOMINAZION LANGOBARDE
di Josef Marchet

Cu la vignude dai Langobarts e scomence une altre pagjine di storie dal Friûl, dute diferente di che che si lei par solit sui libris di scuele. Chei che a rivarin chenti te Vierte dal 568 no jerin salvadis vignûts fûr dai boscs: une vore di lôr a jerin stâts in Italie a batisi cuintri i Bizantins, dongje dai Gotics, e a cognossevin benon il paîs e lis usancis (1). Fintremai in chel an a jerin stanziâts in Ongjarie e te basse Austrie, indulà che a vevin vinçûts e pleâts i Gjepits; cul imperadôr di Orient a jerin in leghe. Par ce reson che le vebin rote no si sa; si sa che ai prins di Avrîl dal 568 a rivarin a Cividât e il lôr re Alboin al stabilì come duche so nevôt Gjisulf e lu lassà cuntun trop des miôr "faris" e des miôr cjavalis che a vevin daûrsi. Dal Friûl a scjamparin chei pôcs latins che a jerin ancjemò culì o che a jerin tornâts cui Bizantins; il vescul Paulin di Aquilee si ritirà a Grau cundut ce che al veve di plui valôr (2). La ondade dai Langobarts e passà fûr drete viers la Italie e no si sa che culì a vevin fat malans (3). Il ducât dal Friûl al restà, in pratiche, come un stât indipendent: al jere masse lontan de capitâl dai Langobarts par sintî la autoritât dal re; cence contâ che ducj i ducâts le sintivin pôc e che cualchi volte nol jere nissun re. Al pues stâi che, dopo muart Alboin, sot il re Clefi e in chei agns che i Langobarts no verin re, ancje in Friûl a sedin stâts netâts dal dut i vanzums de romanitât: sigûr che tai doi secui de dominazion dai Langobarts al scomparì dut chel tant, o chel pôc, che al restave ancjemò dai timps de paronance di Rome. Aquilee e fo bandonade dal dut. La glesie e restà dividude in doi tocs, cuntun patriarcje a Grau e un a Cormons e po a Cividât: cun chel di Grau che al jere tornât in union cun Rome, a restavin i vescui istrians e litoranis fedêi ai Bizantins; cun chel di Cormons che al jere sismatic par vie de cuestion dai "Trê Cjapitui", a stevin i vescui sogjets ai Langobarts. La division in doi patriarcjâts e durà ancje dopo che e fo fate la pâs tra i catolics e i sismatics (4). Il puest di Aquilee romane al fo cjapât di Cividât langobart: une gnove prosperitât, un gnûf sflandôr e une gnove art e cjapà pît e si svilupà te capitâl dal ducât. Gjisulf, Grasulf, Lôf, Wetarith, Rothwald, Pemon, Ratchis, Aistolf a forin duchis dal Friûl e personalitâts di prin plan te storie dai Langobarts e cualchidun di lôr (Ratchis, Aistolf) al deventà ancje re di chel popul. Si puedin viodi lis testemoneancis di cheste grandece tal Museu di Cividât, che al à la plui largje e innomenade racuelte di memoriis e relicuiis langobardis.