LIS INVASIONS
di Josef Marchet

E je usance di dâ il non di invasions a chês che a vegnin in Friûl de bande di soreli jevât e di liberazions a chês che a vegnin di soreli a mont. Verementri i storics a lassin crodi che lis invasions a sein rivadis di sore in jù. Ma cheste e je une piçule imprecision: in dute la antighitât e la Ete di mieç la "via barbarorum" e fo simpri o chê dal litorâl o il cjanâl dal Nadison. Di chê bande a rivarin Alarì, Atile, Teodorì, Alboin, i Ongjars, i Turcs, e fintremai i Todescs dopo Cjaurêt. De bande di sore a rivarin, par antîc, nome i Celtics: ma chê no si pues dî che e sei stade une invasion, parcè che dulà che lôr si postarin, par tant che al pâr, nol jere a stâ nissun: e inalore si varès di fevelâ di un "insediament". E sul cont di chês che si usin a clamâ invasions e sarès ancjemò cualchi altre idee di dreçâ e di meti a fûc: i popui che a rivarin in Friûl dal Orient, a passarin dibot simpri fûr pe Basse, pocjis voltis parsore Udin; e cu lis lôr devastazions a sdrumarin par plui lis citâts o i paîs e lis costruzions fatis dai latins e a faserin maçalizi de popolazion latine o latinizade. La Stradalte e fo dispès il lôr coridôr. Plui in sù, lis incursions di passaç no rivarin e cun chês altris la int si visà nome
di vê gambiât paron. Ancje il miscliçament des razis al fo plui o mancul fuart su la planure; ma sui cuei e massime tes monts la çocje celtiche e restà dibot pure fintremai ai nestris timps: al baste fâ a ment ai caratars somatics e al temperament dai Cjargnei, dai Asins, dai Tramontins e dai montagnûi ad implen, in confront dai Furlans des Bassis, par visâsi des diferencis. Un spirt di contrarietât e di resistence e un lengaç crût cuintri dai invasôrs si lu sint tai documents dai vescui di chei timps. E si pues capî il parcè: la organizazion de glesie di Aquilee, che si slargjave sul Friûl, e veve une vore di elements orientâi, ma ancje une buine part di personâl latin, e sul ordenament e su la mentalitât romane e jere insedade la vite religjose, ancje se dispès - massime cu la cuestion dai "Trê Cjapitui" che e tignì il Friûl distacât de glesie di Rome par un secul e mieç - e soflave une fregul di buere autonomistiche o di influence orientâl (juste in chest timp i vescui di Aquilee a scomençarin a clamâsi "patriarcjis" come in Orient). Si pues ancje crodi che sot Odoacri e i prins Langobarts lis glesiis cristianis a sein stadis pôc o trop perseguitadis e dispueadis dai gnûfs parons, che no jerin catolics. Par altri al va dit, ancje in chest câs, che la Glesie catoliche no à nuie ce vuadagnâ cun chel confondi e messedâ catolicitât (chel ven a jessi "universalitât") e latinitât o talianitât, che al vûl dî particolarisim: a volê meti su la cussience religjose di ducj i popui il stamp de mentalitât, de civiltât, da la art latine al è pericul di viodi a nassi cualchi Lutar ogni volte che un popul si svee e si vise di no jessi de çocje di Rome. Ce che al à passât il Friûl in chel secul che al va dal colp di stât di Odoacri fintremai ai timps di Gjisulf (476-588) no si pues dî cun precision, se no si vûl lavorâ cu la fantasie: chês pocjis informazions che si puedin rigjavâ des memoriis di chê volte, si riferissin nome ai fats dai patriarcjis o a lis cuestions dai "Trê Cjapitui" (2).

NOTIS:
(1) Ai timps di Marchet no jerin stâts fats ancjemò sgjâfs archeologjics e, par tant, ce che al dîs nol è atuâl. Al vâl dome pai siei timps.
(2) La storie de Glesie di Aquilee e je gjavade fûr de "Historia Langobardorum" di Pauli Diacun e dai ats conciliârs. I Trê Cjapitui a rivuardin la eresie su la cuestion de dople nature di Crist, condanade dal imperadôr Justinian tal secont Concili di Costantinopoli, in dissidie cun chel che al fo stabilît tal precedent di Calcedonie. Teodôr di Mopsuestie, Teodoret di Cyrrhus e Ibe di Edesse, de scuele di Antiochie, a vignirin acusâts di jessi dai eretics nestorians. Aquilee no acete di considerâju come dai eretics e cussì si distache dal Pape di Rome e ancje dal Imperadôr dal Orient.