LA PARONANCE DI ROME
di Josef Marchet

La paronance di Rome sul Friûl e durà teorichementri sîs secui e mieç (181 devant di Crist - 476 dopo di Crist). In tant timp la Regjon e varès vût di mudâ dal dut la sô muse, e il stamp de gnove civiltât si varès di cjatâlu a ogni pît alçât. Invezit, lassant di bande Aquilee, Cividât e Zui, si pues dî che lis relicuiis de "romanitât" vignudis fûr de tiere furlane fintremai cumò, no son plui numerosis ni plui impuartantis di chês des civiltâts di prin (1). Di chest nol è di smaraveâsi: che un popul al scjafoi un altri e che al vadi a implantâsi tun paîs forest par "puartâ la civiltât" e je une di chês luianiis che si scrivin sui libris di scuele. I parons forescj, par antîc tant che in dì di vuê, a faserin e a fasin il lôr comut e il lôr interès, sfrutant miôr che a puedin lis risorsis dai sîts cuistâts, cence scomponisi di ce che al covente o che al zove a lis popolazions sometudis. I Latins in Friûl no àn fat ni di miei ni di piês di ce che a àn fat i Inglês in Indie o i Spagnûi in Americhe o i Francês in Afriche. A slargjarin Aquilee par ordin che ur coventave slargjade, a faserin lavorâ la tiere daûr lis bocjis che a vevin di mantignî, a vierzerin stradis grandis e piçulis secontri che si presentave la dibisugne pai lôr trafics e pal moviment dai lôr soldâts, a implantarin cualchi borgade e cualchi "stazion" dulà che ur interessave par resons strategjichis o aministrativis. Di ducj chescj lavôrs si pues dî che nome lis stradis a puartarin cualchi vantaç ancje a chê int cjargnele che e restave simpri la part plui grande de popolazion. Cheste int no rivà mai adore di fâsi un puest te direzion politiche o aministrative, ni di vê un fregul di pês o di impuartance tal andament des cjossis, ni di vignî scoltade dai parons. Ancje sul cont de difese militâr, i latins a pensarin nome par lôr: a rinfuarçarin la lôr citât di Aquilee, a implantarin une fabriche di armis pai lôr soldâts a Concuardie e cualchi "castrum" ca e là, che in pratiche nol zovà mai a fermâ o intardâ lis invasions che si strucjarin chenti plui tart. I sîs secui e mieç de dominazion romane si puedin dividi in dôs Etis dibot compagnis: tai prins trê secui Aquilee e cressè di popolazion e di impuartance; i Celtics, pôc disponûts a adatâsi a vivi di sclâfs, a forin pestâts e talpinâts cence remission; al fo sistemât un ordenament aministratîf dut in man dai latins; e fo implantade une rêt di stradis e su lis stradis a nasserin lis borgadis e lis "stazions": dut par ordin dai parons e cul sudôr de popolazion locâl. In chei altris trê secui e mieç, che al ven a jessi dopo di Traianus (+ 117 dopo di Crist) il Friûl al fo simpri cjamp di bataie o par vie des invasions (che a scomençarin sot di M. Aurelius, cui Marcomans e i Sarmatics) o par vie des vueris tra imperadôrs che a cirivin di ribaltâsi un cul altri. I latins no salvarin il Friûl ni des invasions gotichis dal re Alarì (401-408 dopo di Crist), ni di Atile (452 dopo di Crist), ni di tantis altris tampiestis barbarichis che a rivarin chenti de bande di soreli jevât massime tal ultin secul dal imperi roman ocidentâl. La dominazion romane si distudà suntun mâr di maseriis: Aquilee sdrumade, Zui scomparît, des fatoriis implantadis dai romans, restât nome cualchi non ca e là, di chei altris borcs o cjistiei e des stradis, juste cualchi memorie e cualchi vanzum che al tornà in lûs in chescj ultins timps. A tirâ lis sumis, i latins a lassarin il Friûl piês di ce
che lu vevin cjatât.

Notis:
(1) Ai timps di Marchet no jerin stâts fats ancjemò sgjâfs archeologjics e, par tant, ce che al dîs nol è atuâl. Al vâl dome pai siei timps.