di Franco Mossenta

   Cuant che o jeri frut inte mê vie ogni tant al passave il gue e mê mari e aprofitave par fâsi uçâ lis fuarpis, i curtis e justâ lis ombrenis che a vevin cualchi magagne. Il gue al meteve lis fuarpis intun anel di fier insieme a dutis chês altris che la int dal borc i veve dât e cence meti une etichete par ricognossilis, cuant che al tornave a lavôr fat, i tornave a mê mari propit lis sôs fuarpis, i siei curtìs e lis sôs ombrenis.

   Mi soi simpri domandât cemût che al faseve a visâsi di ducj i articui di dutis lis personis che i devin alc di justâ. Al domandave cuatri carantans, tant che la mame i diseve simpri di tignî il rest. Prime che la mame e murìs, zaromai dodis agns, al tornà chest gue e rivade la ore di paiâlu, il gue i de la ricevude fiscâl pal lavôr fat, insistint par dâje, par no vê fastidis cu la finance.

   Un doi agns indaûr, une domenie matine, une vôs amplificade di une plere a dut volum e ufrive di guâ fuarpis e curtìs. A jerin trê ombrenis che a spetavin un mestri e duncje o lei fûr par familis meti a puest. Inte vie a jerin doi oms suntune fiat 127 che a stavin rivant in chel ae altece dal gno porton. Come che mi vioderin a fermarin la machine. Chel che al guidave al vignì viers di me, intant che chel altri al tirave sù il portelon daûr de machine mostrant une muele che e funzionave a eletricitât, clarementri colegade ae batarie de machine.

   I dei lis ombrenis di justâ e un pâr di fuarpis di uçâ. O tornai in cjase par cjoli il tacuin e une volte tornât sul porton, chel che al veve viert il portelon daûr lu stave sierant e chel che al jere vignût a cjoli la robe, al jere za li di gnûf, mostrantmi lis riparazions fatis e lis fuarpis guadis, complimentantsi cun me pes ombrenis e invidantmi a tignîlis di cont.

   Viodint che a vevin za finît il lavôr o pensai che a vevin di sei verementri in gjambe par vêlis sistemadis in cuatri e cuatri vot, ma sintintmi fâ i compliments par chês vecjis e scjassadis ombrenis mi si dreçarin lis orelis. I domandai trops bêçs che o vevi di dâur e ae sô rispueste di cuarante euros, us sparagni chel che o si sin dit dopo.

   No i ai dât cuarante euros.
   La ricevude fiscâl no mê àn dade.

   Chei doi che a àn servît me a jerin meridionâi.
   Il gue che al servive mê mari al jere furlan.

   No mi sint talian.

   Jo mi sint furlan.