LA BRÛT
di Catarine Percude -

    Viodêso che cjase di contadins dongje il puint de Manzanisse? La strade gnove che i passe parmìs le à cuasi sepulide e cui che al ven di Udin , cuant che al rive te ombrene des agacis plantadis sul alt, al cjale plui vulintîr di chê altre bande il legri prât che i sta in face. Pûr in chê cjase malinconiche l’an passât, di carnevâl, a son vignudis a marît dôs bielis fantatis intun bot.
    A vignivin contentis si ben che a savessin di cjatâ dôs puaris maladis; a vignivin par assistilis e par judâ une altre biele zovine, lôr cugnade. Un agnulut che, cence lagnâsi, di cualchi an a puartave di bessole dut il pês de numerose famee. Come trê sûrs a son ladis subit dacuardi e in dì di gnocis a àn scomençât a stâ su une gnot par om dongje il jet de lôr puare madone.
    Done Massime Martelosse e jere stade une brave femine che e nudrì cun onôr la sô fiolance, zovins daben e verementri valents. Ma tai ultins agns une malatie di gnerfs la veve rindude impotente e, par zonte di disgracie, e veve dongje di jê une fie, no maridade, ancje chê simpri malade.
    Lis trê cugnadis a procuravin di consolâlis cul lôr afiet e cu la lôr continue assistence. Cumò a vignivin a consultâ la viele pes facendis di cjase, po dopo a fâsi insegnâ lis pratichis de famee: si devin di volte par fâur compagnie e dispès ur puartavin sul jet i doi fantulins de prime, doi biei ninins graciôs e cocolons che cu lis lôr manutis a cjareçavin la puare none e le fasevin vaî di consolazion. E une di lôr, Bete Carline, pensant che e dovès stâ miôr se e ves vût un bon jet, le persuadè a cambiâ di cjamare e, cjapade tal braç e ben involuçade, jê e so marît la puartarin a planchin inte lôr e la meterin tal propri lôr jet.
    Massime Martelosse e je muarte tal jet nuviçâl di sô brût. Te so vite e à vût un mont di travais, ma il Signôr Idiu i à dât ancje une grande consolazion: chê di viodi prin di murî plantadis te sô cjase trê buinis e bravis cristianis.
    Cuant che o passi sul puint de Manzanisse, o cjali che cjase brute, malinconiche, basse e mâl fabricade, pûr mi pâr plui biele di cualsisei palaç, parcè che dentri al è un grant tesaur: al è il cûr di Bete Carline e des sôs cugnadis.