di Franco Mossenta

    O jerin ai 10 di Setembar dal 2005. Mi cjatavi a New York par rindi omaç a lis vitimis dal 11 di Setembar dal 2001. Daspò vê fat un sorelûc par viodi dulà che tal doman o varès vût di metimi durant la cerimonie, o decidei di lâ a fâ un zîr pe citât, che za vincjecuatri agns prime o vevi  visitât, par viodi i cambiaments de stesse.

    Jentrât inte glesie di San Patrizi pe puarte laterâl, o lei in font (in Americhe a usin cussì) par comprâ une crôs celtiche, cuant che un fevelâ familiâr mi rivâ te orele. Mi zirai e o viodei une siore cuntune zovine di cirche vincj agns che e stave fevelant par furlan. Mi svicinai a lôr e o disei: 
"Magari la siore e je furlane."


    I si iluminarin i vôi a sintimi fevelâ par furlan.

   Ben, cheste siore, de provincie di Pordenon, emigrade in Canadà agnorums prin, cu la fie e fevelave par furlan, ca in Friûl, lis maris si fasin un pont di onôr a fevelâ cui propris fîs par talian, par che no vedin di cjatâsi in dificoltâts a scuele tal studiâ il talian.

   Se che zovine canadese e ves di vignî in Friûl o crôt che si cjatarès in imbaraç cun chei de sô etât. Jê fevelâ par furlan e chei altris par talian.


   Nie pôre, a puedin cumbinâle fevelant par inglês.