Valdai XII: il discors complet di Vladimir Putin

   L’argoment de conference di chest an al è: Societât tra vuere e pâs: superâ lis  logjichis dal conflit tal mont di doman.

Il president de Russie, Vladimir Putin.

Coleghis, sioris e siôrs, 

permetêtmi chi di saludâus, in chest incuintri periodic dal Club internazionâl di Valdai. Al è vêr che par plui di dîs agns chest al è stât il contest par discuti i argoments plui urgjents e considerâ lis direzions e lis prospetivis di svilup de Russie e dal mont intîr. I partecipants, al è clâr, a cambiin ma, ae fin, chest apontament di confront al manten il so jessi, o podìn dî che si sin trasformâts intune sorte di ambient di mutuâl comprension.

Chi la discussion e je vierte: chest al è un contest inteletualmentri libar par un scambi di ponts di viste, valutazions e previsions che a son une vore impuartantis par nô, chi in Russie. O volarès ringraciâ ducj i politics, i esperts, i funzionaris publics e i gjornaliscj rus e stranîrs che a àn partecipât a chescj incuintris.

Chest an la discussion e à par ogjet la vuere e la pâs. Chest argoment al è cun clarece stât ogjet di preocupazion pe umanitât dilunc l’intîr cors de storie. Fin de antichitât, la int si domandave su la nature, su lis causis dai conflits, su la legjitimitât o mancul dal ûs de fuarce, su la cuistion se lis vueris a varessin acompagnât par simpri il disvilup de civiltât, dome cun sostis di treguis provisoriis, o al sarès vignût il timp dulà che lis disputis e i conflits a saressin stâts risolts cence la vuere.

 O soi sigûr  che voaltris culì o vês ricuardât il nestri grant scritôr Leone Tolstoj. Tal so famôs romanç “Vuere e pâs” al scrivè che la vuere e je in contrast cu la reson e la nature umane, là che, seont lui, la pâs e je un ben pe int.

Al è vêr: la pâs, une vite pacifiche, a son simpri stâts un ideâl pe umanitât. Statiscj, filosofs e legjislatôrs a àn simpri promovûts modei par une interazion pacifiche tra lis nazions. Diviersis coalizions e aleancis a àn proclamât che la lôr finalitât e jere sigurâ une pâs lungje e stabile, come si use a dî. In ogni câs il probleme al è che dispès chestis coalizions a àn po dopo sielzût la vuere come strument par risolvi lis contradizions che a cressevin al lôr interni, intant che la stesse vuere e à dât la fonde par gnovis jerarchiis daspò la vuere tal mont.

In efiets la pâs, come stât te dinamiche politiche mondiâl, no je mai stade stabile e no je mai vignude di bessole. I periodis di pâs te storie europeane e mondiâl si son simpri basâts sui ecuilibris di fuarcis dal moment. Chest al è stât tal decim setim secul, al timp de cussì clamade Pâs di Westfalie, che e sierà la vuere dai 30 agns. Po dopo tal vincjesim secul, al timp dal Congrès di Viene, e di gnûf setante agns indaûr a Yalta, cuant che i vincidôrs dal Nazisim a cjaparin la decision di meti in pins la Organizazion des Nazions Unidis e di stabilî i principis base des relazions tra i Stâts.

Cu la rivade des armis nucleârs al è deventât clâr che intune vuere mondiâl no saressin stâts vincidôrs. O varessin vût dome un risultât: la mutuâl distruzion sigurade. Cussì, tal tentatîf di creâ armis simpri plui distrutivis, il gjenar uman al à capît che ogni grande vuere no sarès servide a nuie.

Ogni tant i cjâfs politics dal mont tai agns Cincuante, Sessante, Setante e ancje Otante dal Nûfcent, a àn menaçât di usâ la fuarce militâr come misure ecezionâl. Dut câs si son compuartâts cun responsabilitât, considerant dutis lis circostancis e lis consecuencis pussibilis.

La fin de Vuere Frede e à sierât cu lis contraposizions ideologjichis, ma a son restadis su la taule lis cuistions che a varessin podût provocâ des divergjencis o dai conflits gjeopolitics. I Stâts a àn simpri vût e simpri a varan i lôr interès contraris, di fat dilunc di dute la storie mondiâl si è vude competizion tra nazions e aleancis di nazions: chest al è dal dut naturâl.

La nestre prime preocupazion e je sigurâsi che cheste competizion si disvilupedi al interni di une suaze di normis e regulis politichis, legâls e morâls prestabilidis. In câs contrari la competizion e i conflits di interès a podaressin puartâ a crisis grivis e a esplosions dramatichis.

O vin assistût diviersis voltis, in passât, a chest tip di disvilup. Vuê, par sfortune, o sin di gnûf rivâts a frontâ situazions di chest tip. I tentatîfs di promovi un model di domini unilaterâl, come che o ai plui voltis dit, a àn provocât une alterazion dai ecuilibris che a guviernin il sisteme dal dirit internazionâl e des normis che a dissiplinin i procès globâi. Chest al significhe che al esist il pericul che la competizion politiche, economiche e militâr e podedi scjampâ vie dal nestri control.

Come esempli: ce pericui compuartaressie, pe sigurece internazionâl, cheste competizion cence control? Un numar cressint di conflits regjonâi, in particolâr tes zonis di confin, dulà che i interès des principâls nazions a jentrin in conflit. Il pussibil naufragji dal sisteme di no proliferazion des armis di distruzion di masse (altre eventualitât che o consideri une vore pericolose) al podarès, come risultât, lescjâ une gnove spirâl di corse ai armaments.

O vin za viodût saltâ fûr il concet dal cussì clamât “prin colp disarmant”, che al previôt l’ûs di armis no nucleârs a lunc rai e a alte precision dai efiets similârs a chei di armis nucleârs.

L’ûs de menace di un atac missilistic nucleâr iranian tant che pretest, come che o savìn, al à distrut la base fondant de moderne sigurece internazionâl, il Tratât cuintri i Missii Balistics. I Stâts Unîts a àn denunziât il tratât in maniere unilaterâl. Lu disìn pe croniche: vuê o vin risolt la cuistion iraniane e no je plui nissune menace dal Iran come, lu ai a pene dit, no je mai stade.

Il fatôr che al pareve vê puartât i nestris interlocutôrs americans a fâ sù un sisteme di difese cuintri i missii al è vignût a mancjâ. Al sarès resonevul spietâsi che i programs pal disvilup dal sisteme american di difese cuintri i missii al vignìs fermât. Invezit: ce sucedial? Nuie dal gjenar; anzit, il contrari: dut al continue.

Ai 13 di Dicembar dal 2001: i Stâts Unîts a denuncin il Tratât ABM

Al è di pôc che i Stâts Unîts a àn fat il prin test dal sisteme di difese cuintri missil in Europe. Ce significhial? Al significhe che o vevin reson cuant che si impontavin cui nestris interlocutôrs americans. A cirivin ancjemò une volte di ingjanâ nô e il mont intîr. Par dî pan al pan e vin al vin: a stavin mintint. La fantasiose menace iraniane no centrave nuie, no je mai esistude. Chel che si voleve fâ pardabon al jere distruzi l’ecuilibri strategjic, alterâ i rapuarts di fuarce a propit favôr, no dome par procurâsi une superioritât, ma par metisi tes cundizions di detâ a ducj la proprie volontât: ai propris aversaris gjeopolitics e, o crôt, ancje ai propris aleâts. Chest al è un senari tant pericolôs, che al menace ducj, includût, o crôt, i stes Stâts Unîts.

La fuarce di dissuasion nucleâr e à pierdût la sô eficacie. Facil che cualchidun al vedi ancje vude la ilusion che e sedi di gnûf pussibil, par une part, vinci une vuere mondiâl cence consecuencis ireparabilis, inacetabilis (come che a visin i esperts) pal vincidôr, amitint che int podedi sei un.

Tai ultins 25 agns lis risiervis par usâ la fuarce si son une vore ridusudis. La vacine cuintri la voie di vuere, cjapade sù di ducj nô a nivel psicologjic, daspò dôs vueris mondiâls, si è indebilide. La percezion stesse de vuere e je cambiade: pai telespetatôrs e je deventade planc a planc, e aromai considerade, une specie di intratigniment mediatic, come se nissun al murìs tai combatiments, come se la int no patìs e come se interiis citâts e intîrs paîs no vignissin distruts.

Par sfortune la terminologjie militâr e sta deventant part de nestre vite di ogni dì. Ae stesse maniere, vueris comerciâlis e sanzions a son deventadis une realtât de economie globâl di vuê: cheste frase e je aromai normâl tal lengaç dai media. Lis sanzions, dal rest, a son spes usadis come strument di concorence sleâl par stressâ o azerâ la competizion dai marcjâts. Come esempli o podarès nomenâ il vignî fûr patologjic des multis imponudis a societâts, comprendudis societâts europeanis, di bande dai Stâts Unîts. Si usin pretescj cence fonde e ducj chei che a olsin violâ lis sanzions unilaterâls americanis a vegnin cun severitât cjastiâts.

O savês, a podaressin no sei afârs de Russie, ma cheste e je une cunvigne di discussion, e alore o domandi: ise cheste la maniere di tratâ i aleâts? No, cussì si tratin i vassai che a olsin a agjî seont la proprie volontât e che a vegnin cjastiâts par punizion.

L’an passât e je stade fate a une bancje francese une multe di cuasi 9 miliarts di dolars, 8,9 miliarts, o crôt. La Toyota e à paiât 1,2 miliarts, invezit la Commerzbank todescje e à sotscrivût un acuardi par paiâ 1,7 miliarts al belanç american e vie indenant.

O viodin tal stes timp il disvilupâsi di un procès che al puarte ae creazion di blocs economics no trasparents, un procès disvilupât lant daûr di dutis lis regulis de cospirazion. La finalitât e je clare: riorganizâ la economie mondiâl intun mût che si podedi sigurâsi plui grancj profits gracie ae superioritât e al diferenziâl esistent tai standarts che a regolin la economie, il cumierç e la tecnologjie.

La creazion di blocs economics cu la imposizion des regulis dai atôrs principâi nol rindarès al è clâr il mont plui sigûr, ma al crearès dome bombis a timp, metint lis fondis par altris conflits.

Une volte e esisteve la Organizazion Mondiâl dal Cumierç. E je vere, la discussion no va indenant in maniere sflandorose in chel contest e la session negoziâl di Doha no à concludût nuie. Ma o varessin di continuâ a cirî soluzions e compromès, par vie che dome il compromès al pues puartânus ae creazion di un sisteme di relazions che a duredin in cualsisei suaze, includude la economie. Al contrari, se o ignorìn lis preocupazions di cualchi paîs partecipant ai colocuis economics, se o din par sigûr che a podedin sei lassâts in bande, lis contradizions no si risolvaran, a restaran. Chest al vûl dî che prime o dopo a fasaran sintî i lôr efiets.

Come che o savês, il nestri svicinament al è diviers. Tal preparâsi a meti in pins l’Union Economiche Euroasiatiche, o vin provât a disvilupâ lis relazions cui nestris interlocutôrs, includudis lis conessions cu la Iniziative Economiche de Vie de Sede cinese. O lavorìn in mût atîf suntun plan di paritât cui paîs dal BRICS, dal APEC e dal G20.

Vuê il spazi mediatic globâl al è ancje lui scaturît di veris e propris vueris, come che si dîs. Il pont di viste “just”, la uniche interpretazion dai events a vegnin imponûts ae int; cierts fats a vegnin taponâts o manipolâts. O sin ducj abituâts ae usance di etichetâ e di creâ la imagjin di un nemì.

Lis autoritâts di paîs che a a parevin jessi simpri lâts daûr dai valôrs de libertât di peraule e de libare circolazion de informazion, naine che o vin cussì spes sintude in passât, vuê a cirin di blocâ la difusion di informazions obietivis e di cualsisei opinion divierse de lôr. Le clamin “propagande contrarie” che si à di combati, usant cun clarece mûts antidemocratics.

Magari cussì no, ma o scoltìn lis peraulis “vuere” e “conflit” cun frecuence simpri plui spes, cuant che o cjacarìn di relazions tra int di diviersis culturis, religjons e etniis. Vuê centenârs di miârs di migrants a tentin di integrâsi intune societât divierse cence vê un mistîr e cence cognossi la lenghe, lis tradizions e la culture dai paîs dulà che a van a vivi. Di chê altre bande i residents di chei paîs (o vin di acetâ chest cence cirî di indorâ la situazion), i residents, o disevi, a son iritâts de presince dai forescj, dal peiorâ des statistichis relativis ai tas di criminalitât, dai bêçs dai belançs statâi spindûts pai rifugjâts.

Tal 2015 il lâ indenant de crisi siriane al à produsût un flus di sfolâts direts viers la Europe.

Dal sigûr tantis personis a provin un sintiment di solidarietât pai sfolâts e a volaressin judâju. Il probleme al è come fâlu cence penalizâ i interès dai residents dai paîs di destinazion. In mancjance di une soluzion il scuintri cence control e traumatic di diferents stîi di vite al pues produsi (di fat al sta za produsint) un aument di nazionalisim e di intolerance e al sta fasint vignî fûr conflits permanents inte societât.

Coleghis, o vin di sei realiscj: il podê militâr cence fal al è, e al restarà par tant timp ancjemò, un strument di politiche internazionâl. Positîf o negatîf, chest al è un fat de vite. La alternative e je: usâlu dome cuant chei altris mieçs si son esaurîts; cuant che o vin di fâ front altris menacis come, par esempli, il terorisim, e cuant che lu fasin in acuardi cu lis ricognossudis regulis dal dirit internazionâl; o pûr usâ la fuarce par cualsisei motîf, magari dome par ricuardâ al mont cui che al comande, cence preocupâsi de legjitimitât dal ûs de fuarce e des consecuencis, cence risolvi i problemis, ma dome moltiplicantju.

O viodìn ce che al stâ sucedint tal Orient vicin. Par decenis, se no par secui, conflits tra etniis, religjôs e politics e fuartis problematichis sociâls si son ingrumadis in chê regjon. In pocjis peraulis: si stave preparant za une tampieste, cuant che i tentatîfs di comedâ la regjon a son deventâts la faliscje che e à provocât une vere esplosion, cu la distruzion des organizazions statâls, une esplosion di terorisim e, in conclusion, plui pericui pal planet.

Une organizazion teroristiche, il cussì clamât Stât Islamic, al à cjapât il control di cetancj teritoris. Pensait: se a ocupassin Damasc o Bagdad, lis bandis teroristichis a podaressin otignî in pratiche il ranc di une potence uficiâl, a podaressin creâ une fuartece pe espansion globâl. Cualchidun i aial pensât? Al è timp che dute la comunitât internazionâl si rindedi cont cun cui che o vin a ce fâ: al è, di fat, un nemì de civiltât e de culture mondiâl che e puarte daûr une culture di asse e barbarie, folpeant, e duncje comprometint, ducj i valôrs morâi e religjôs, includint chei islamics.

No coventin zûcs di peraulis: no vin di distingui i teroriscj in moderâts e no moderâts. O volaressin savê la diference. Forsit, te opinion di cierts esperts, i teroriscj cussì clamâts moderâts a tain il cjâf a mancul int e in mûts plui zentîl.

   Al continue....